📖 ZKIZ Archives

時薪50難請人 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121018/18043263
上次講起兩本書「健康跑步樂」與「健康游泳樂」，中貿林話想買，但在書局搵唔到。呢兩本書嘅出版商「紅出版社」負責人來電通知，兩本書在商務、三聯、大眾有售，請中貿林移玉步到呢三間書局睇吓！
電 腦Ｊ約吃晚飯，與研究Ｃ共聚於中總俱樂部，中總啲老派廣東菜冇乜好彈，炸雞、蒸魚、柚皮皆一流，兼且晚上中區清靜，朋友談話好地方也。可惜左丁山不是會 員，要掹衫尾先至入得去食飯。想起上星期有老同學夫婦自加拿大回港，財務Ｎ訂位於銀行家會，約埋幾位同學開餐，吃過之後連財務Ｎ都話：「唔，乜咁多賓架會 員識飲識食，都唔搞好會所啲中餐呀？」
吃飯之時，研究Ｃ講起，曾有90後校友向佢請教，有兩份工，一份係政府工，一份係商界職位，究竟應揀邊份？ 研究Ｃ根據佢曾在政府機構及跳槽商界嘅經驗，一口咬定要揀商界，指商界加人工機會大好多，唔使在政府機關內論資排輩，要升上高位，望到頸都長。左丁山就以 為因人而異啫，做事一板一眼之人，做商界反而難以適應。
今日香港失業率低，正是事求人多過人求事，請勞動工人尤其不易。餐飲集團老闆Ｓ經營多間中 式、西式、日式食肆，佢話以大型酒樓計，租金佔成本12%至15%，工資佔成本30%至35%，但工會領袖硬係唔信，指提高最低工資之影響殺傷性遠低於加 租，大家雞同鴨講。事實上，今日在港島請洗碗工人，老闆Ｓ話出到時薪五十元都未必有人肯做，試過有女士去佢地一間日式餐廳見工，一睇到餐廳人客爆棚，女士 只講一句：「乜咁多人客㗎？」掉頭就走，費事傾。另一間西式餐廳生意冇咁好，反而容易請到洗碗女工。既然出到時薪五十元搶人，何故反對最低工資提升到多過 30元？老闆Ｓ話：「因最低工資係一刀切立法，訂立咗就冇得減少，以後只會繼續升，變成工資僵硬化，兼有漣漪效果，好頭痛。」呢個講法另有註解，歐洲國家 之失業率扯高，與工資之downward rigidity（下調僵硬度）有關，因歐盟國家大力保護工人工資與保護就業，加薪容易減薪好難，經濟不佳之時，商界點都唔肯聘請工人，因為大家都知道易 請難送。講到呢一點，老闆Ｓ等資本家就難與立法會嘅「泛工黨」福利派溝通咯。
PermaLink: https://articles.zkiz.com/?id=38946
Next Page
ZKIZ Archives @ 2019