📖 ZKIZ Archives

派得好投資組合年結 (2011-2012) PARTIPRAL 派得好

http://partipral-hk.blogspot.hk/2012/06/2011-2012.html
以今日收市價計, 投資組合現時持股狀況:


未做年結前先交代今個月操作, 月中用左組合4萬現金去抽iBOND, 幸運地中哂, 上市第一日即沽出獲利. 由於該筆資金套現自賣出聯亞及海通, 其間兩股無再大幅向上突破, 所以今次換馬行動尚算成功, 而今個月亦可以擺多兩千蚊落自己個股票倉入面. iBOND對部份人黎講係一個好好既投資工具, 雖然唔能夠帶來任何實際回報 (名義回報-通漲率), 但如果買股買左N年都係得個吉, 真係倒不如揸下iBOND起碼唔駛煩又民企風暴, 又假數疑雲. 我自己過去一年叫過好幾個身邊既人買大快活, 吉之島等等, 但一般換黎既反應都係嫌三嫌四, 遠遠唔及叫人買iBOND咁一呼百應. 當好多人都無勇氣去搏股票, iBOND其實係一條絕佳出路.

除左短炒iBOND外, 尋日亦沽出5份1大快活持股. 或者講多少少我對大快活既睇法, 減持並不代表我看淡大快活, 只係半年前我曾經對大快活內地業績有一定期望, 上月股價處高位時亦曾加注, 到業績公佈後發現原來實際經營情況並非太順利, 就不敢再過份樂觀. 其實以上下半年業績作比較, 大快活其實無太大進步, 每股$0.92左右既核心盈利, 根本單靠中期業績已經可以推算得到. 半年以來股價升超過4成, 可以理解為完全來自市場對公司評價急升. 把握到低位切入, 當然要繼續牢揸不放, 因為估值有權一升再升. 不過最終不論股價抑或派息, 始終仍然要靠業績推動, 以現價計, 值搏率比起半年前顯然有所不及, 此乃我減持小部份既主要原因.

唔經唔覺個投資組合已經運作左兩年, 由於我一向主張減低操作次數, 所以期內可回顧既交易得失並不太多. 最大體會始終係覺得有時一個組合要運作得好, 將戰線收窄至自己可控制範圍至為重要. 將組合打得太散, 往往令整個組合更難舉步向前. 香港股市之內有能力乘風破浪既公司日益減少, 盈利增長受限制之餘, 相對而言估值亦偏貴. 當普遍公司股息, 股價持續反覆向下, 投資者感到心灰意冷實屬正常, 形成惡性循環後, 整個逆勢就更難扭轉. 明知形勢比人強, 其實更值得集中持股, 避開投資無太大把握之公司. 無錯持股集中有機會會導致一失足成千古恨, 但事實上當人人都再無信心去搏像霧又像花既公司, 有能力者其實只會愈賣愈貴.

今年有兩段時間自己亦試過相當無癮, 上年8,9月俾大市打殘只屬其次; 最感到矛盾同迷惑其實係12月至今年1月呢段日子. 明明大市低位勁彈, 但自己組合踢都唔郁. 明明自覺分析無錯, 市場無反應, 最怕係公司有隱疾而自己懵然不知, 低位加注, 遲早一鋪清袋......and the rest is history. 投資股票就係咁, 一方面又要尊重市場, 另一方面又要尊重自己. 戒急用忍過程相當痛苦, 但此乃取得好回報必經階段. 次次唔願跳出舒適區, 無耐性, 見少少唔對路就引刀成一快, 往往只會令人原地踏步.

當初將本BLOG命名為ROAD TO FINANCIAL FREEDOM, 今日回望, 更顯得當日何其自大. 計計數, 真正要做到財務自由其實談何容易. 就算退而求其次, 想退休有少少好日子過, 都仲要將個投資組合好好地滾存多40年. 今日既我只可以講財務自由係超終極目標, 難度可能比得上用專家級打爆DIABLO. 目前唯一可以做既係繼續努力朝此目標進發, 過程中可能會跌跌宕宕, 但若然方向正確, 我仍然有信心可以做得到.

聽朝出發去2星期俄羅斯同東歐自由行做BACKPACKER, 雖然預算有限, 但總算有機會見識下外面世界, 可惜係去旅行先黎打風, 真係黑仔到震. 呢段時間無機會睇市, 但照計問題不大, 加上組合現金水平超過3成, 玩都玩得心安理得. 仲有幾間公司業績未詳細研究, 旅行回來應該有時間可以再望多兩眼.



======================================================
上月月結: 派得好投資組合月結 (MAY 2012)
上年年結: 派得好投資組合年結 (2010-2011)