異動空間：明年緊記一句話
1 :
GS(14)@2018-01-08 01:32:55今年個市一句話就能夠總結：炒大不炒細。恒指升35%，中型股升32%，小型股升18%，創業板跌25%。原因之前亦分析過：全球步入加息、收水年代，資金成本增加，銀包少咗錢，自然要揀好股去買，唔會亂咁炒，令業績高增長的科技股、估值吸引、股息率高的大藍籌受惠，這是今年全球現象，絕非港股獨有。港股炒大不炒細，除了宏觀因素外，仲有北水及自身的因素。北水今年南下奪港股「話語權」，資金主要為機構投資者，揀股首重流動性高，能夠買得多先贏得大，故此又係撲去大價股。再者，今年證監全力打老虎，收緊上市條例，細價股動彈不得，令兩極化情況更嚴重。展望明年，美國加息收水繼續進行，理論上不利股市，但特朗普稅改會帶來短期刺激，可以頂個市再衝一段。港股方面，明年會推出同股不同權，吸引螞蟻金服、小米等創新型公司上市，預期下半年會開始登陸。已在港掛牌的同類型公司如眾安（6060）、閱文（772）、美圖（1357）等，上半年有機落鑊炒一轉，特別是3月公佈業績前後，如公司交到數，股價就有運行。明年緊記一句：繼續炒大棄小。魏力會繼續掘好嘢畀大家，明年再見！魏力
http://fb.com/2012jason本欄逢周一、五刊出
來源:
https://hk.finance.appledaily.co ... e/20171229/20258773