【果籽人話】唔接客替長者義剪 髮型屋老闆：大家都會老嘛
1 :
GS(14)@2018-01-07 16:13:37吳坤宇（Eric，左）去年開始，大概每隔三四個月，就會替有需要人士免費剪髮，至今已舉辦五次義剪。
全新旅遊專頁，即like籽想旅行：
https://fb.com/travel.appleseed馬鞍山被戲稱為「美食沙漠」，皆因大商場內清一色是連鎖食肆，以為走入小商場會有較多選擇，怎料髮型屋隨時多過餐廳。這個毗鄰區內最大商場新港城中心的富輝商場，樓底不高，燈光略為昏暗，商店集中在一樓，快走一遍再屈指一算，食肆大概就四至五間，髮型屋卻有六七間，辦過數次義剪的「V8 Hair Salon」是其一。現年46歲的老闆吳坤宇（Eric）解釋不計成本義剪的原因：「我覺得呢班人需要幫助多啲，大家都會老嘛，我都想自己老咗之後，有多啲人關注同幫助。」或許馬鞍山此地確是美食沙漠，但馬鞍山的人卻絕不冷漠。
每次義剪，事前也要用一個月時間籌備，包括設計和印製傳單。
店舖面積約300呎，月租四萬多元，Eric說商場內的六間髮型屋各有各做，生意不成問題。
與區議員合辦首次義剪，議員辦事處始終並非理髮的最佳場所，連鏡子也欠奉。（受訪者提供）
Eric從小就熱愛髮型，「讀書年代已經搞到好潮，成日俾老師罰。」他試過做文職，「真係唔得，我覺得好悶呀，坐喺度無嘢做要扮有嘢做。」以為是工作太靜態，後來又跟大哥做過一年地盤，發現原來自己要的不在於靜或動，而是自由，「髮型呢行你鍾意做乜都得，無嘢做可以睇媖電視、撳媖手機。」入行一做就是廿多年，三年多前頂手此店，易名V8 Hair Salon，他笑說：「『V』代表勝利，『8』就因為我哋中國人覺得老利，仲有同頭『髮』音似！剪頭髮梗係去V8啦，幾易記！」意思居然就這樣直白，說實話，是老土的，但夠真摰。
婆婆滿意的笑容，就是義剪的動力來源。
Eric的太太（右）幫忙為參與義剪的街坊登記，街坊更可留下電話號碼，方便下次再有義剪時通知他們。
剪髮這一行的自由，當然不單在於閒時可以看電視玩電話，「如果你有能力，你唔使睇人哋頭，你有本事就可以直接做，做你自己啲嘢。」有自己的店舖，自由度就更大，甚至大得可以選擇全日不接客，只做義剪。義剪服務在一年多前開始，為65歲或以上長者、殘障人士和其他有需要人士免費剪髮，第一次是跟區議員合作，在議員辦事處舉行，「地方太細，得兩個位，又無鏡，乜都無，總之好多嘢都唔就手。」後來自己再辦，索性就在V8，「我哋乜架生都齊全，風筒等等乜都有，唔使搬來搬去，方便好多。」他至今已辦了五次義剪，每次反應都不錯，大概有三十多人參與，就算有人遲到、早到甚至事前沒有報名登記，Eric也會第一時間幫他們理髮，若做不來的，就會請V8其他髮型師幫忙，「我專登揀呢日放假，咁就有多啲時間義剪。如果其他師傅有客嘅，佢哋咪照做，總之我今日唔接客。」這套方法讓一眾跟Eric搵食的師傅心服口服，大家都樂意幫忙義剪，邊剪髮邊跟老友記們談笑風生，加入V8近七個月、已幫忙做兩次義剪的Elwo說：「唔好話阻我哋幾耐，其實十分鐘內已經可以成個頭剪晒，我覺得最緊要係見到啲長者開心，咁就可以。」接客分佣拆帳是髮型師典型的收入來源，Eric能感染到身邊人不計較金錢地助人，確實難得。義剪只包剪髮，若頭髮較亂，理髮師們也會幫忙用風筒吹吹，但就不提供洗頭和造型服務。去十分鐘單剪店剪髮，也要$56，V8這樣一間髮型屋，單剪的價錢是$100。每次三十多人參與，加上傳單設計和印刷費、師傅手工費、不接其他客所放棄的生意……一次義剪要多少成本？「成本呢樣我又無特別計，因為講真嗰句，又唔係話好多。」Eric續說：「如果樣樣都太商業化，覺得做呢個嘥我時間、覺得唔值就唔做，你就無咗個進步機會。」說得漂亮，但事實是否蝕住做？Eric立即搖頭回答：「我覺得係調轉，可能得益嘅係我，你幫人嗰時，可能人哋都幫緊你。」他記得之前有位婆婆特意來找他剪髮染髮，在閒談間問起婆婆為何知道V8，婆婆答：「上次你幫我做義剪，你幾有心，今次我咪嚟染髮，幫襯番你哋！」所謂好心有好報，就是如此簡單的事。看着一個個老友記高興地剪髮，流露出滿意的笑容，離開時一句：「多謝晒！好生意呀！」、「唔該你！下次見！」，就是名利以外的另類收穫，也是Eric做義剪的動力來源，「我住喺馬鞍山差唔多三十年，喺馬鞍山做髮型師都十幾年，用剪髮嘅手藝去答謝街坊最有意思。剪髮嘅手藝除咗可以搵食，亦可以幫到人，千祈唔好睇小髮型行業。」
V8 Hair Salon地址：馬鞍山富輝商場1樓7號舖記者：李煒汯攝影：王國輝
來源:
https://hk.lifestyle.appledaily. ... e/20171231/20260362