湯文亮：睇好樓市的 盡是賣樓的人
1 :
GS(14)@2018-01-07 12:34:59【明報專訊】昨日有老友叫我不要再發表評論樓市的文章，有報章已經請了20位專家替樓市把脈，全部都睇好今年樓市，我睇完有關文章之後，發覺一件事，於是同老友去了街市買餸，去到菜檔，問賣菜婆蔬菜靚唔靚，佢話靚到無倫；去到肉舖，我還未問，師傅已經話豬牛肉都冇得頂；隔鄰魚佬話，今日唔食魚就笨。
理論上，以上3位都是他們老本行的專家，他們都話好。其實是否真的是咁好？於是我們問一位正在買餸的師奶，菜肉魚是否真的如他們所說的咁靚，師奶就話，賣花讚花香呀，咁都唔識！我當然識。但報章編輯唔識，20位睇好樓市的專家盡是賣樓的人。
如果20位專家包括零售行業的人，他們會話今年生意難做，現在不但滿街吉舖，甚至連年宵攤位還有幾十個未租出，唔好以為那些攤位租金很貴，其實只需要幾百元就可以租9日。經營零售業的人並不太睇好樓市，經營飲食業的人又如何？他們同樣會話生意難做，而且高度集中在一些名店，應該有不少酒樓食肆捱不到過年，不過，他們會話，連本業都未做得掂，又點敢講樓市？
銀行家又點睇樓市？他們會話，香港的確有相當多存款，理論上可以多借出街，不過，除了受到金管局逆周期措施影響之外，有很多打算借錢買樓的人也過不了壓力測試，雖然他們可以問財務公司借錢買樓，但這並不代表他有能力依期還款，如果他們出事，一定會影響樓市，所以大多數銀行家並不睇好今年樓市。
買樓收租的人又如何？他們一定睇好樓市。老實說，他們不會睇淡樓市，但亦不現在買樓收租，更何况政府推出15%的DSD新印花稅之後，基本上已經沒有人買樓收租。
太專注本業 預測易出誤差
至於20位專家一致睇好樓市，樓價是否一定會上升？這又並不是必然的，我記得在2009年初，全部樓市專家一致睇淡樓市，並且排隊開記者招待會發表他們的預測，當年樓價不但沒有下跌，到了第四季，政府更要出招打壓樓市。當時，我問那些專家點解會睇錯市，有一個答案值得大家參考：他們因為太專注，睇不到影響樓市的其他有利因素，所以預測出了誤差。
紀惠集團行政總裁
[湯文亮 敢說亮話]
來源:
http://www.mpfinance.com/fin/dai ... 3870&issue=20180105