📖 ZKIZ Archives

三大要求 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120615/16427439
以前講過有一位法國酒商移居香港之後又搬咗去新加坡，近日會返嚟辦消暑酒展銷。老友問佢新加坡生活與香港如何比較，佢話：「新加坡最好就係住，租金只係香 港一半，租住面積冇少到噃，仲實用多啲㖭，另外空氣好好多，子女教育呢，嗱，入學容易得多，外國投資者子女有優先，但係我個人感覺，香港國際學校似乎水平 更高。其他就冇乜點咯，我好懷念香港嘅美食與生活。講到做生意，梗係香港好啦！」
講起教育，最近有人批評曾特首與哈羅勾結，令人感嘆，亦提醒新特首梁先生，你話要學吓新加坡效率，又會有產業政策，恐怕他日難以實行噃，大凡推動優惠政策，政客初時話好，一旦有人攻擊利益輸送，官商勾結，政府就會狼狽不堪。
人 人都話新加坡好，呢日碰到賓架 P，問佢驚唔驚新加坡競爭，賓架 P話：「冇乜好驚嘅，銀行界人士都有同政府人士傾過偈嘅，我地向有關人士只係反映三個意見：（一）搞好空氣質素，比新加坡差少少就得，唔好差到依家咁樣； （二）增加國際學校學位，等啲 expats肯嚟香港；（三）增撥土地在中環及西九龍興建甲級商廈，讓租金降低，去東九龍喎，係逼於無奈搵唔到地方嘅啫。只要政府真係做好呢三樣，我地自 然識得發展銀行業務，毋須政府操心。」
三個要求似乎好簡單，實則係政府死穴，左丁山不敢奢望。簡單啲講，改善空氣質素，要減少碳排放，即係要兩電 多用天然氣發電，即係增加電費，點搞？其次，增加國際學校學位，見到哈羅事件，問梁振英能夠怎麼辦？俾外國投資者 expats子女優先入學，本地人必定嘈到拆天，點搞？其三，梁振英林鄭月娥只管中小型住宅單位，對豪宅與中環西九甲級商廈並不熱心，寫字樓供應繼續在東 九龍出現，與新加坡商業中心（ CBD）甲級商廈之多，差好遠啫，點搞？有位朋友在四大核數師行工作，在觀塘返工，大感不便，甚有怨言，佢在新加坡 CBD見到四大核數師行之一有成幢大廈，更加覺得香港租金貴。
PermaLink: https://articles.zkiz.com/?id=34361
Next Page
ZKIZ Archives @ 2019