知己知彼：上車走捷徑
1 :
GS(14)@2017-10-09 00:02:05梁振英教曉我哋一個萬能key，一切嘅社會問題都源於土地問題。所以林鄭一上任，第一時間就係先幫市民解決住屋問題，特別一班無殼的年輕人，「首置上車盤」計劃係第一炮，先塞住你把口。「首置上車盤」有讚有彈，有傳首置上車盤的定位介乎居屋與私樓之間，收入限額定為5.2萬至7萬，對於一啲自稱搵5、6萬一個月都上唔到車嘅年輕人，可能係好事；但對於搵2至4萬一個月嘅人，公屋又冇、居屋又抽唔到，諗住今次實冇死，點知一班月入5、6萬嘅中產又嚟爭飯食，真正嘅夾心依然被夾。點樣上車係一個永遠嘅話題，中秋佳節，親朋戚友聚頭難免會傾到買樓問題。每個成功置業嘅人都會有自己嘅上車經歷，有人死慳死抵儲首期，有人靠慈父慈母，有人借到盡都要買樓，筆者分享最近聽到嘅一個上車經歷。
A君到18歲就和家中一位老人開始排公屋，讀書不多的A君月入萬零蚊，一開始沒有超額，排了四、五年，隨着工作年資增長，入息也過了限額，於是佢開始轉工。但A君志不在公屋，而在差不多獲分配公屋時，佢向房屋處申請綠表，一年前以綠表資格買入一間二手居屋，借九成半，首期只需廿幾三十萬，成功上車。佢冇理人點講，總之過咗海就係神仙。風吹知
來源:
http://hk.apple.nextmedia.com/financeestate/art/20171006/20173850