📖 ZKIZ Archives

矽谷利誘學生輟學 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120607/16403856
NBA東西岸決賽，打到今日，相信還未分出勝負，左丁山老早預測係東岸熱火對西岸馬刺，兩大天王巨星占士與獲迪大戰三員老將鄧肯、柏加與真奴比利，勁力氣 勢與經驗沉着大比拼，事前幾難話邊隊可以贏到 NBA總冠軍，雙方要打到 Game7分勝負都唔奇，點知道西岸雷霆與東岸塞爾特人分別力逼馬刺與熱火，有反先可能，左丁山隨時跌眼鏡。
每年 NBA決戰時刻，就是選秀時期，上星期各隊抽籤（弱隊，輸得最多嗰隊有優先）排名選秀，米高佐敦嘅山貓雖然戰績最曳，但抽到排名第一嘅籤，竟然係紐奧爾良 黃蜂隊，贏得第一位選秀權，佐敦認真運滯。以前中學畢業生（如占士，拜恩，加納特三位巨星）可以直接參加選秀，後來各方面認為中學生心智未成熟，應該起碼 讀過一年大學先至可以參加選秀，於是令到各大學嘅籃球好手，未畢業就紛紛鬆人，讀一兩年就去打 NBA，呢班人叫做 underclassmen，咁又係嘅，如果有 NBA球會選中，最低薪酬有年薪四十七萬美元，擁有學士學位嘅畢業生出嚟打工，可能做到退休都冇如此高薪。
香港學生自2000年科網股爆破後，絕 大部份高考成績優異生完全唔睇資訊科技工程系或電腦科學，一窩蜂湧去讀醫科或環球商業，特區新政府話搞科技，不妨研究下呢個現象先。矽谷方面啱啱相反，對 電腦科技學生求才若渴，周圍搶人，華爾街日報最近報道話，矽谷啲大公司、小公司，創投基金發晒癲咁去招聘電腦專科生，等大學生畢業都嫌慢，索性向 NBA學習，到大學利誘 underclassmen輟學加入矽谷公司，以電腦科技聞名嘅卡納基梅農大學，就有一位三年級生（主修電腦與藝術）突然收到獵頭公司一封信，請佢考慮即 時加入一間科技公司。現時一名電腦系畢業生嘅基本年薪係七萬五至十萬美元再加移居費用及簽字費五千至一萬五千美元，相當吸引。 Google請咗四百名「學生大使」在全球一流大學為 Google揀蟀及宣傳到 Google工作之好處。一位 Facebook嘅投資者 Peter Thiel索性設立一個計劃，向二十名學生每名送十萬美元，叫佢地離校兩年為佢做事。香港啲理科生注意嘞，自問有條件嘅，不妨向大學申請入讀 Information Engineering，話唔定二三年級時已收到美國科技公司聘書！
PermaLink: https://articles.zkiz.com/?id=34153
Next Page
ZKIZ Archives @ 2019