ZKIZ Archives


蔣家旻破格演出心情沉重蔡思貝慘遭毀容

1 : GS(14)@2017-07-05 03:49:39

無綫同愛奇藝合拍嘅《踩過界》前晚播第3集,故事劇情亦都逐步進入戲肉,講完譚凱琪全裸展示佢嘅人體藝術之後,今次輪到蔣家旻俾有錢仔許家傑非法禁錮兼虐待。其實成個故事情節好「大台」,都係話做啤酒妹嘅蔣家旻,喺酒吧賣酒俾許家傑睇中,跟住俾佢0氹咗返去屋企,喺密室禁錮咗一個月,結果蔣家旻嘅婆婆去咗酒吧搵蔡思貝、王浩信同張振朗求助,先至揭發呢件事。跟住蔣家旻喺法庭講番事發經過,先知許家傑一直受佢爹哋單立文操控,造成佢性格唔平衡,只要佢受完爹哋氣,就會返去虐打蔣家旻!而為咗令蔣家旻收聲,單立文仲搵咗黑社會捉咗佢阿婆,而許家傑想去差館自首,甚至畏罪自殺,每次都俾單立文阻止。一向做慣乖乖女嘅蔣家旻,當日有傳因為拍電影《第一次不是你》做私鐘妹,獻出完第一次性感後就俾公司掟入雪櫃,失蹤咗一輪先有得解凍。不過話晒今次係公司安排,當然無後顧之憂搏到盡,難怪佢話嗰幾場虐打、成個頭俾人浸落水嘅戲,都係一個大膽嘅新挑戰,仲影響埋嗰排心情,變得好沉重。至於09年香港先生冠軍嘅許家傑,入行咁多年做過唔少角色,但係發揮機會唔多,直到近年轉咗做啲奸奸地或者賤男角色,總算令人留有印象!許家傑喺網上平台留言,講到今次演出,佢話:「其實為咗呢個角色,我自己嘅心情都好沉重,打人嗰種心理壓力永遠係比被打嗰個痛苦,嗰種感覺要掌握得好好,太過火就會影響成件事!」聽講今次佢為咗呢套戲,推晒所有工作,事前仲睇咗好多關於虐打嘅戲,令到拍嗰陣情緒極度沮喪,好彩佢拍完最尾一場浸蔣家旻落水嘅戲,好快抽離到角色。許家傑仲話有人問佢會唔會繼續拍呢類角色,佢留言話:「做演員好被動,唔係自己控制到,我反而覺得把握機會,最緊要做好手頭上嘅角色,我相信只要做得好,一定會有人欣賞!」喺呢個單元故事,亦會講到蔡思貝老竇秦煌後生嗰陣係黑社會大佬,因為俾其他黑幫追殺,搞到老婆俾人斬死,阿女蔡思貝亦被斬傷,塊面從此留疤,自此之後退隱江湖開酒吧。




來源: http://hk.apple.nextmedia.com/entertainment/art/20170703/20077016
蔣家 家旻 破格 演出 心情 沈重 蔡思 思貝 慘遭 毀容
PermaLink: https://articles.zkiz.com/?id=338029

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019