中環在線：郭炳江撐阿媽續任主席 李華華
2008-11-21 AppleDaily
新地（016）郭老太同二仔郭炳江，噚日出席新地慈善基金贊助嘅「城市藝坊」活動，大家最關心嘅，梗係郭老太係咪會連任做新地主席，雖然新地通告披露咗佢老人家符合資格兼願意連任，但大家都好想聽到郭老太親自回應。
活動喺沙田新城市廣場露天舉行，剛啱噚日天氣轉凉，華華坐坐吓都覺得陣陣凉意，何況上咗年紀嘅郭老太，所以當大隊人馬欣賞戶外展品時，已經唔見佢芳蹤。聽聞上次開幕儀式時郭老太已經睇咗展品，加上覺得凍，所以早早上車走先。
大佬復職睇董事局
雖然大家都搵唔到當事人回應，好彩仲有郭炳江代答，佢話郭老太應該會繼續做主席，因為「聽唔到阿媽話唔做」喎，但點都要等12月股東大會通過。咁郭老太肯坐主席位咯，睇怕都冇乜人反對嘅。至於大佬郭炳湘幾時復職，就要由董事局決定。