ZKIZ Archives


狠批689撕裂社會劉夢熊「梁應硬唔硬應軟冇軟」

1 : GS(14)@2017-06-10 12:37:12

■劉夢熊形容梁只是水平低的管治者。王心義攝



【本報訊】「拍錯手掌,燒錯炮仗,投錯票箱,撐錯老梁」,前頭號「梁粉」劉夢熊7年間由特首梁振英的親密戰友,變成陌路人和赤柱階下囚,有份捧CY上權力寶座,劉夢熊毫不客氣狠批梁令社會撕裂空前恐怖,但不應高估其好勇鬥狠,「佢應硬時唔硬,應軟更加冇軟」,形容梁只是水平低的管治者。記者:袁楚雙


劉梁恩怨始於2010年3月,梁振英兩會期間主動接觸時任全國政協委員的劉夢熊,讚劉具政治智慧,邀助打特首戰,「我初步點頭,即刻畀佢打蛇隨棍上」,梁表明想劉幫忙為N年不選特首論和地下共產黨員傳聞拆彈。同年5月梁出席劉太壽宴,上第三道菜時他稱天雨家中水浸,要告辭歸家善後,「點知佢第六道菜又返嚟:『夢熊,搞掂啦!』,好畀面。」他覺得梁對朋友有交帶,「我先畀佢感動,仆心仆命撐佢。」對手唐英年遲了一年才找他,誠意稍遜:「佢由頭到尾都係講紅酒,冇講任何政綱理念」,最終篤定撐梁,讚梁反應快,「佢需要利用一個人嘅時候,就識去做姿態,令人感動。」


「佢水平好低」

劉落力造勢,梁終以689票踏上香港權力之巔,但疑出爾反爾無委任劉入行會。2012年9月反國教與被指搞港獨的光復上水行動,劉均曾向梁獻計但不獲接納,期間曾提出以不反對通知書等條例入手壓港獨聲勢,「佢面燶燶咁,可能心諗『你教我做嘢呀?』始終冇郁手。」沒料梁卻在2015年施政報告點名批評港大《學苑》。劉說梁處理港獨「先投降後冒險」,致局面進退失據,反映管治思維混亂,「有人話佢鬥爭成性,其實有時都唔係咁,我覺得佢水平好低,依我見解,佢應硬時唔硬,應軟更加冇軟。」2014年政改方案討論得鬧哄哄,劉記得當時連建制派在內無一政黨提出過半數提名的特首選舉方案,惟最終人大按中央港澳工作協調小組意見拋出8.31決定,「當晚啲高官,除咗佢(CY)一個人烚熟狗頭之外,個個都燶口燶面」,他指梁無據理力爭有利香港的方案,對港人普選願望落空有不容推卸的責任。隨後的佔領運動,劉直指梁「掟87粒催淚彈引起人怒火」,之後卻做縮頭烏龜拒絕面對群眾。梁治5年,劉夢熊指論修身梁有UGL事件5千萬元未申報受查;論齊家又連環爆出齊昕摑母親、行李門等事件;治國下其敵我意識更是巨大錯誤:不論建制與泛民、行政立法關係等全面撕裂,管治失大於得。撕裂的還有他與梁的關係,劉因威脅梁中止東方明珠案調查妨礙司法公正罪成,劉相信歷史自有公論。



97年主權移交至今,香港前進還是倒退?「蘋果」與你細數廿載風雨。【回歸二十年】專頁:http://hksar20.appledaily.com.hk




來源: http://hk.apple.nextmedia.com/news/art/20170606/20045930
PermaLink: https://articles.zkiz.com/?id=334658

Next Page

ZKIZ Archives @ 2019