中環在線： CEO劈炮潮 繼續上演
1 :
GS(14)@2012-07-07 18:04:02http://hk.apple.nextmedia.com/financeestate/art/20120706/16489734
踏入7月呢個暑假季節，都係學生哥同老師放假嘅日子，不過最近7.1前後好多上市公司嘅行政總裁（ CEO）都辭職「放大假」，一時之間多咗好多 CEO下崗。除咗主席同 CEO齊齊劈炮嘅思捷（330）﹔新聞多多、有血汗工廠之稱嘅富士康（2038） CEO程天縱前日亦唔撈，加上噚日李寧（2331） CEO張志勇退任，真係可以組成一個離任 CEO俱樂部。
程天縱半年即鬆人
其中富士康嘅程天縱坐正 CEO個位只得半年，華華喺5月底嘅股東會先見到佢一面，估唔到話咁快就以健康同家庭理由向老闆郭台銘遞信。對於愛將唔撈，郭老闆前日同台灣傳媒講﹕「大家都跟我一樣想退休，讓年輕人有機會歷練。」郭老闆轉頭就話，會由富士康執董、有「台灣手機產業第一人」嘅池育陽暫時接任程天縱嘅職務。呢位池生今年54歲，足足細程天縱6年，郭老闆講得出做得到，一眾年輕郭家軍可能有運行嘞。
除咗富士康同思捷，最近有 CEO落馬嘅公司都唔少，好似西王糖業（2088）副主席張研就辭任執董兼行政總裁職務，而中國新能源動力（1041）、伯明翰環球（2309）、盛明國際（231）、中國金石（1380）、承達國際（2288）嘅 CEO亦紛紛落馬，齊齊放暑假。