知己知彼：借財仔上車搏盡無悔？
1 :
GS(14)@2017-05-13 01:54:05大學生流行講一個潮語「搏盡無悔」，想做就做，唔想後悔就要搏到盡。有統計顯示，今年入伙嘅新盤由財仔提供一按預計有821宗，佔整體15.5%，而2016年只有唔夠9%。借財仔買新樓嘅人，其實就係抱住一個搏盡無悔嘅心態入市。無殼蝸牛想買樓最重要係筆首期，自從金管局2015年收緊按揭，購買價值700萬以下的自住物業，銀行最高按揭成數由七成變六成，上車難度又升呢，首期哪有錢？！地產發展商為咗谷新盤，?班上車客落叠，實行撈埋財仔幫買家承造高成數一按，最高做到九成半按揭，免壓力測試、免入息證明。樓價屢創新高，銀行按揭收緊，上車機會越來越少，發夢都想上車嘅人見到呢條捷徑，難免心郁，就算硬食高啲息都照按，點解？為上車去到盡！如果你一樣想同財務公司按盡九成買樓，諗住上咗車就係過海神仙，勸你三思，勿輕視樓市風險。有時唔係搏盡就代表件事係正確，或者可以合理化成件事，大學生可以開口埋口「搏盡無悔」，係因為就算錯咗，佢地都輸得起。要造九成按揭先上到車，負擔能力有限，畀你避到壓測又如何。供樓壓力大，假設你買500萬新樓，按九成供25年，按揭息率2.15%，每個月要供近兩萬。當你死慳死抵先供到樓嘅時候，份工一有咩閃失，冇錢供樓，層樓就會淪為銀主盤。或者，只要樓價跌超過一成，你層樓就已經變成負資產，再跌就收樓，一舖清袋。為上車去到咁盡，你輸唔輸得起？風吹知本欄逢周五刊出
來源:
http://hk.apple.nextmedia.com/financeestate/art/20170512/20018802