【動畫●心理分析】情緒勒索係咩？輔導員：香港人唔黐線唔正常
1 :
GS(14)@2017-04-22 10:50:40《心理追兇》角色文哥自小受媽媽「情緒勒索」，最終崩潰殺死了媽媽。
女仔係咁撒嬌要男友做啲佢唔想做嘅事；小朋友一哭二鬧扭父母買玩具；長者無禮老奉要年輕人讓座，呢三件事一律都係「情緒勒索」﹗前者利用別人不好意思、羞愧、自責，要人就範。香港大學社會科學(輔導)碩士，現為實習戲劇治療師的伍嘉瑩提到我哋有時會不自覺咁樣，令身邊人情緒困擾。「情緒勒索係你有意圖地用情緒達到目的。」tvb劇集《心理追兇》內角色文哥的媽媽就經常對佢情緒勒索。伍嘉瑩說：「個角色從細到大被佢媽媽灌輸全世界只得媽媽對你好。個媽媽用呢樣嘢逼個仔一定要聽話，即使佢唔開心唔願意都都不能反抗，咁樣其實好影響情緒。」這類情緒勒索佢認為在華人社會好普遍，對着長輩大家好多時都會將鬱結吞下就算。到自己不能承受時，她認為要找個平等的空間，向對方說出感受，表達不快的事實，但非指責。「我哋有時都會咁做，但要衡量會否令對方不安或不舒服，到某個點接近崩潰。」即使人人都不以情緒勒索他人，大眾價值觀、政府施政荒謬足以把人逼瘋。「學生有自殺問題，我冇諗過政府只係每間學校比五千蚊。有時真係學生多啲，一個人買條雪條都唔夠錢。」一條命賤過一條雪條﹗思歪害人，影響一生。「高鐵、三跑、港珠澳大橋不停超支，你幾億幾億掉落去，好啦，GDP好高，數字好靚，但係大家係咪真係開心？我去大陸快咗幾分鐘，生活質素就可以提高咩？社會氛圍覺得要用數字判斷你係咪成功，根本就逼到一個人黐線。你唔發癲先唔正常。」我懷疑佢一秒可以講十個字，字字擲地有聲，痛快講出我的感受。她經常入學校帶小組練習，對學生處境頗理解。她發現學生很多時不懂用言語表達情緒，會用其他方法宣洩。「佢哋發牌氣時真係唔會有乜形容字眼，佢哋可能只會講句粗口，或者打人。」老師未必有時間慢慢梳理學生情緒，只會同學生講打人唔啱。「但佢唔明白點解不可以打人。你要慢慢一步步問佢問題，等佢知道人有憤怒情緒，但點回應有好多選擇，打人非唯一出路。」她早前到加拿大學校參觀，發現當地小朋友好樂意跟輔導員傾訴。「同朋友嗌交唔識處理，小朋友都可以入紙要求見駐校專業輔導員。佢哋從小培養咗一個好習慣，認為任何情緒都可以同人講。」香港小朋友沒這麼幸福，即使成年人遇上精神困擾，未至於係情緒病，往往只會叫自己樂觀一點，但強顏歡笑又點會有用呢？「從事精神健康服務的專業人士，除了心理學家與精神科醫生，仲有治療師及專業輔導員，遇上情緒困擾，其實有好多求助選擇，很多出路。」輔導員會幫受助人把事情整合，以另一角度呈現，過程中不帶任何批判。
外國有這類情緒卡，讓小朋友學習表達感受，香港小朋友無論在校或在家都較少這種訓練。
伍嘉瑩是港大輔導碩士，也是一位實習戲劇治療師，在香港學校工作時發現學生被問及感受時，總是啞口無言，不懂表達。
如果可以派嬲畀呢個人，我希望係一萬個。
記者：葉青霞攝影：張志孟2017果籽繼續認真知味。識買惜用。行以求知。好事多為。重修舊好。緊貼果籽報道，即like：
http://fb.me/AS.AppleDaily緊貼「蘋果VR」熱潮，打開雙眼隨意門，讓「蘋果VR」陪您探索新世界：
https://goo.gl/b5RQAB「蘋果VR」App
App store下載：
https://goo.gl/0kW2cK
Google Play下載：
https://goo.gl/4K7EHw
來源:
http://hk.apple.nextmedia.com/su ... t/20170422/19997694