【文化籽】《一念無明》關注精神病 康復者：要當我哋係人
1 :
GS(14)@2017-03-04 10:19:52片中很多對白刻意示範處理關係最差的方法、最傷害的話。導演表示電影核心是愛需要學習。
【文化籽：藝文沙龍】「精神病患者要食藥」，同「肚餓要食嘢」一樣，似乎冇乜好質疑。可是藥只能治標，治本良方，係十斤耐心溝通加上廿斤平等對待慢火煲埋嗰一碗。先後被診斷患上社交焦慮、強迫症、抑鬱症、躁狂及精神分裂的鄭仲仁最明白呢服藥功效。電影《一念無明》主角患有躁鬱症，導演黃進拍攝前向鄭「取經」。雖然故事苦過廿四味廿四次方，光影間卻盡是關懷。
不用萬念俱灰，只要一念無明，已夠讓人自願跟死神遠走。無明即望唔透、望唔清。精神病患者越搵出口，越係兜圈。余文樂在片中演躁鬱症患者，亢奮抑鬱兩路夾擊，被關進精神病院。細個被父母忽略、工作壓力、照顧病母重擔、女友唔認同，冇一樣唔推佢埋牆角。電影聚焦佢出院後如何被歧視，左鄰右里當佢危險人物，連阿爸曾志偉都怕佢傷害自己，問你點頂？單靠食藥真係醫得好？負可能。佢喺極低潮，日復日蜷伏在床上，雖生猶死之時，一牆之隔劏房小孩願意同佢傾偈，冇當佢「唔正常」，令余文樂喊咗出來。黃進說：「小朋友同阿樂相處好平等、好接近，無理世俗對佢嘅標籤，可能比藥物更珍貴。」呢個唔只係電影橋段，從事精神健康服務的社工鄭仲仁以過來人身份證實。「我13歲前仲係叫『鄭仲仁』，13歲後就變成咗『精神病人』。父母唔明白情況，會鬧我打我，好孤立，冇人同我分擔睇精神科醫生嘅羞恥。直至廿幾歲，我嘅人生都好暗淡。」
余文樂演出時而高山時而低谷的躁鬱症患者，有驚喜。
余文樂辭工照顧總是惡言相向的病母金燕玲，負面情緒一直無法釋放。
女友方皓玟把余文樂帶到教會，以為可以幫到他，卻不了解對方需要甚麼。
抑鬱30年 單靠食藥冇用
後來他到復康中心做治療，有個職員把他當作普通青少年看待。「佢會聽我講我有乜壓力，有時會講吓點樣識女仔，甚至爆吓粗，呢種社交好重要。」他自言看了廿幾三十年精神科醫生，最幫到佢的係這位職員。鄭續說：「大家一直認為精神病係腦部化學物質問題，食藥就可以好番晒。藥喺我最嚴峻嗰陣令我舒服啲。我抑鬱到晚晚都想死，啲藥可以令我瞓着都識笑，但係我醒咗唔會笑。」他提及最近的港鐵縱火案，認為大眾草率地把事件歸納為「佢冇食藥」。「當局只會諗點樣控制，令佢冇風險，整個制度冇當精神病患者係人，只希望佢哋唔生事，唔理你生活得有冇意義，總之你成個人謝晒，植物人咁，佢哋就覺得最安全。」鄭仲仁說現正看公立醫院精神科醫生的人超過22萬，剛過去一年，新症有四萬幾。把精神病患者隔離，就可close file？鄭仲仁認為係推卸責任，其實人人都有份令其他人困擾。黃進同意，「我哋係共生，唔可以話呢個係環境問題，你我都係對方嘅環境因素。」社會有把人逼瘋的因子，卻沒有善後的解藥，歧視令患者更難康復，這是我們的共業。公營醫院缺資源，一個應該以人為本的病科，一樣流水作業。「醫生將我由抑鬱診斷為精神分裂，轉變咁大佢只係用咗15分鐘，而且冇解釋畀我聽。」他又記得有次詢問醫生藥物副作用，醫生只看着電腦冷冷地說：「我好多病人喺外面，冇咁多時間答你問題。」電影也有余文樂與精神科醫生零溝通，機械式對答橋段。黃進說：「我唔覺得醫生想咁樣醫病，但佢得到嘅資源只能夠咁樣。」「好多人都有情緒同壓力，過了某個界線，就會被定義為『有病』。其實可以唔使分得咁清楚，就當我哋走得比較前，經驗豐富啲。」多了解少偏見，大家都可以幫精神病患者找到光明出口。
曾志偉作為照顧者承受很大壓力，為對方好卻不得其法。不懂得愛，最後變成了傷害。
同一屋簷下各劏房戶，不欲與患有精神病的余文樂共住一室，逼曾余二人搬走。
小朋友不戴有色眼鏡看余文樂，令他得到支持與認同。
鄭仲仁與精神病「同行」30年，現在不用依賴藥物，耍太極、影相、寫書法都是他自助方法，最重要當然是修補與家人及朋友的關係。
黃進提到電影在多倫多電影節首映，有類似經歷的觀眾向他們表示電影有安撫作用，令他很鼓舞。
上映日期：3月30日場地提供：1563 at the East記者：葉青霞攝影：林栢鈞（部份圖片為電影劇照）編輯：謝慧珊美術：楊永昌
來源:
http://hk.apple.nextmedia.com/su ... t/20170304/19946460