太古廣場：利是錢做乜好？識揀一定唔會儲！
1 :
GS(14)@2017-01-27 07:40:05加番句家長指引先，家姐唔係教人亂fing錢，只係點樣用得有意義啲啫。老老實實，得嗰千幾至幾千蚊，如果想用嚟滾幾百蚊收益，就參考番《蘋果》財經版啦吓！利是錢，三個字，豐儉由人。如果大家唔係被電子派利是的話，通常到初十五拆都走唔甩千幾銀，返幾層office嘅可以去「洗樓」?利是嘅更加唔使講啦。呢個range儲又唔係多，一次過食晒佢又好似太浪費？醒啲另類投資過你啦。今年農曆年都算近新曆年頭，大家新一年有無話要做多啲運動呀，個人健康啲咁呢？如果你係放工跑兩步就攰嗰種人，有啲嘢醒你：用利是錢畀自己上一年PE堂！話說上年呢啲月費做運動App喺OL界相當之hit，因為實在係好抵！家姐我join咗個K字頭嘅，仲要係500蚊年代就join咗（家陣新會員要700蚊啦，但仍然抵喎，睇埋就知），每個月畀錢，唔使簽約，可以喺個App度揀十樣運動做，計落每一堂都係幾十蚊咋陰功。其實道理就好似運動版Uber咁，都係共享經濟嘅一種。將啲細規模嘅瑜伽、健身、打泰拳嘅中心放晒上去，畀你慢慢揀，每樣嘢一個鐘，好似以前上PE堂咁，今日可以去打一個鐘泰拳，聽日可以做瑜伽，喺手機book完，個人準時show up就得，地方揀番近自己office，放工做完返屋企食飯都得。不過以前個App仲有好多可以蒸吓身、蒸吓腳呢啲嘢玩，家陣都無晒喇，變咗要額外畀錢。個App另外好就係可以望下有咩活動先課金，砌到成個月時間表的話，咪健康吓囉。呢個係其一，如果唔想由做運動着手，想食得健康啲嘅，都有計！仲可以食埋英鎊平條水㖭呀！英國有個blogger，姑且叫佢KOL啦，介紹健康零食介紹到出晒名，家陣自己每個月揀啲健康嘅零食，塞落一個surprise box度，訂購咗嘅用戶可以每個月都收到一盒有零食有飲品嘅sourced box。如果日日坐office都係食熱浪、麥提莎嘅，咁不如試下啲天然海鹽焦糖bar、天然拖肥波波，或者西蘭花脆片啦，咁食法都無咁有罪惡感！不過呢個投資就可能要請教網購達人喇，因為係要先寄去英國，再代運嚟香港嘅。買足一年嘅驚喜健康零食，計番家陣英鎊都係千幾二千蚊咋，呢個價錢每日食熱浪飲檸茶都係食到八十幾日，仲會生痘痘㖭。【家姐教路】無論係用利是錢嚟買乜嘢都好，最抵一定係入晒落銀行，再用信用卡嚟買，用利是錢找信用卡條數。做運動App一定要用信用卡畀啦，呢個無計；至於英國零食，如果可以自己搵到代運服務，就可以碌英鎊自己買，賺到miles又唔使畀代購賺。不過小心代運收費呀，家姐中過伏，買咗三盒零食運番嚟要500蚊！三盒零食都係300幾蚊咋陰功。用代購之前，一定要先用佢個計算機預測吓運費係幾多呀！資料補充：做運動App係Kfit，英國零食係Sourcedbox，本人並無持有以上股票關家姐
http://fb.com/kwangajei本欄逢周五刊出
來源:
http://hk.apple.nextmedia.com/financeestate/art/20170127/19910076