ZKIZ Archives


讀書為增值被質疑學歷蒙牛楊總都係受害者? 李華華

2010-04-29  AD






 

貴為半隻國企嘅 蒙牛乳業(2319)噚日公佈業績,盤數不過不失,所以大家嘅焦點,就放咗喺俾股壇長毛David Webb質疑學歷嘅總裁楊文俊身上。估唔到……一向都會喺業績會現身嘅楊總,噚日竟然缺席,冇計啦,惟有由首席行政官盧建軍代答。

牛根生專 注培訓新人

盧生真係夠朋友,竟然幫口為楊總講好說話,仲話其實嚴格嚟講,楊總都係受害者!盧生話,楊總喺行內做咗成20年,喺蒙牛都做咗 10年,佢有份創立蒙牛,喺業界都係老行尊。佢走去讀嗰個MBA課程,目的都係想充實下自己;再講,楊總作為一個普通老百姓,真係冇能力去check個課 程係真係假o架喎。盧生係咁講唧,唔知楊總自己係咪一樣咁諗呢?

對於主席兼創辦人之一嘅牛根生,噚日突然宣佈由執行董事轉做非執行董事,盧 生又攞出因為時間關係準備好嘅標準答案。佢話人事調動係考慮到集團持續培訓新一代管理層嘅計劃,係考慮到集團未來可持續發展嘅需要,超似港府高官平時出嚟 講嘅口脗。

聽番分析員講,楊文俊同牛根生喺俾投資者聽嗰場業績發佈會都一樣冇蒲頭。華華見嗰啲超巨型國企高層都唔係咁o架喎,啱同唔啱都會 三口六面講清楚,唔知咁係咪反映咗蒙牛未來嘅做事手法呢?

美參院公審高盛調查主席狂爆粗

中資企業高層唔知係咪被學歷風波困 擾,所以無出嚟見人。不過喺地球嘅另一邊,外資大行高盛雖然周身麻煩,仍然大大方方出嚟俾人公審。華華好關心呢單世紀大審判,點知一開機就聽到雞腸粗口 「Shitty」,仲以為轉錯台睇緊《衰仔樂園》。正當華華以為自己幻聽,電視再傳出「Shitty」,先知原來係參議院調查委員會主席萊文喺度爆粗,仲 爆足11次咁多!咪以為萊文咁老仲咁好火喎,實質上係高盛啲高層喺電郵曾經將CDO形容為「Shitty」,萊文只係玩即興潤番佢哋啫!

網 友反應仲快,即刻以車喻債,將隻Abacus CDO換成福特嘅Pinto(出產有問題,易爆炸嗰款),幫高盛解圍。「你賣Pinto畀ACA嗰陣,有冇話Pinto會爆炸?」「係人都知呢款車有可能 爆炸啦!」「點解你唔同個客講?」「吓,我係賣車o架喎!」真係妙問妙答!

老闆三仔爺加薪林高演要減人工

華爾街回復番股照炒 舞照跳嘅美好日子,不過高盛大摩等大行唔想再俾人話,派花紅都收斂咗。香港上市公司唔知係咪有樣學樣,繼霍建寧俾人cut咗成千萬人工後,再有華資家族嘅 太傅俾人減人工!身兼四叔頭號護法、恒地(012)大內總管、李家傑同李家誠太傅等職能嘅林高演,09年人工(連花紅)竟然無厘頭俾人減咗505萬銀,得 番3650.2萬蚊咋!

好奇怪,林太傅人工被cut嘅同時,四叔三仔爺就全部有人工加,阿爸收1285萬;似乎永遠享受寡佬生活嘅大仔,就 袋1481.4萬;至於要養3G(老婆同埋兩個女)、到o依家仲未必到一粒半粒「慈姑椗」嘅細仔,都收1271.8萬銀落袋,係咁意都加咗138.5萬人 工啦!點解?當然唔可以話四叔對佢唔好,因為四叔父子嘅人工主要係固定薪酬,但林太傅主要嚟自花紅,花紅少咗,可能係同恒地舊年業績倒退有關啩!

李 華華

電郵:[email protected]
 



PermaLink: https://articles.zkiz.com/?id=15360

Next Page

ZKIZ Archives @ 2019