高C9手記：新股越來越慳水慳力
1 :
GS(14)@2017-01-18 08:02:47阿飛在財經專欄提到「上一代炒殼還會花心思編織故事，今日慳番，直接炒供求」，對於這種「慳得就慳」深有同感。好似以前每逢有新股上市，係人係鬼，公司管理層總會在上市前後跟傳媒做訪問，好讓投資者知道公司做乜東東，近年上市的公司連這個動作都慳番，許多管理層在敲鑼儀式舉起手指公影張相，純綷證明「到此一遊」，從此與股民不相往來。一般而言，新股有一個約定俗成的程序，公開招股前有記者會、投資者推介會，上市前後，公關會安排公司管理層跟傳媒做訪問，提高曝光率，好歹讓市場知道有多一隻新股面世。但近年啤殼成風，尤其是創業板新股，大部份是全配售形式上市，保薦人搵齊人認購便成事，根本不需要顧及大眾投資者，省卻公關門面工夫。創業板新股上市後，股價爆升幾十倍，無人深究原因，久而久之，爆升是常識，散戶若然跟入，請貴客自理，輸錢唔好喊。許多新股又充滿勵志故事，副學士空姐變行政總裁，護士轉型做主席，地盤工人升呢為建築公司主席，取得會計文憑便可以成為財務總監，可見創業板世界多美好，絕對是錢途無限。高淑嫻
https://www.facebook.com/koc9nine
來源:
http://hk.apple.nextmedia.com/financeestate/art/20170117/19899352