二五中環 萬南 2016/12/30 (週五) 2017年中環十大預測
1 :
GS(14)@2017-01-02 05:20:41http://www.metrodaily.hk/metro_c ... %e9%a0%90%e6%b8%ac/
萬南舊年底寫咗十大預測，結果中咗4個半，其中最應係估中澳門復甦，至於點解有「啱一半」呢？事關估計樓價跌兩成，萬南在7月接近全年最殘時買樓自住，吼到谷底回升。今日繼續搞十大預測，明年底再睇中幾多。
1. 任總出山：其實舊年萬南已寫金管局前總裁白頭任會出山，可惜唔中，但據缸湖中人透露，唔少極具勢力人士斟緊任總復出，打骰睇實盤大茶飯，仲話可能快有好消息！
2. 趙樓神走人：唔經唔覺，長實地產(1113)執董、人稱樓神嘅趙國雄，明年已經幫李超人打工20年，老實講呢個年資喺長和系嚟講唔算特別長，但從水晶球推算，估計佢今年會離職。佢依家至66歲，斷估冇咁快退休，肯定有一番作為。
3. 薯片叔叔現黑材料：直到截稿呢一刻，薯片叔叔仲未正式成功辭職，仍未可正式參選。而喺條街已開始傳佢有黑材料畀人搵到，將會不日爆發。老老實實，萬南唔知材料是否屬實，所以唔敢喺度講，貼士係同一架白色的車有關。
4. 殼價繼續升：今年易手殼股嘅數量相信創史上新高，而且索殼嘅老闆依然不絕，勢令殼價繼續升，所以市值幾億又淨現金股，不妨小注耐心潛伏，隨時贏幾個開。
5. 全配售限PI：今年好多隻全配售8仔新股，上市後都喪升，最佳例子係「翠如BB」老竇嘅聯旺集團(8217)，難怪有人單靠攞配售已贏億億聲。據聞證監為免全配售太多老散參與，有意只限流動資產至少一球美金嘅專業投資者(PI)參加，令富者愈富。
6. 人仔一兌一：人民幣跌勢睇怕明年都停唔到，港銀對人仔一算嘅日子，相信好快又再重臨，唔知北上消費又會唔會興番呢又？
7. 北水南移：正正因為人仔陰乾式下跌，內地資金才不甘捱打，紛紛走出去瘋狂購物，相信未來一年有更多北水殺到，買起全幢商廈的新聞陸續有來。
8. 環保主題當炒：今年炒作主題嘅時間愈來愈短，高人估計明年都係咁樣。至於最吃香嘅主題，高人認為係環保。冇計啦，全國都有污染問題，阿爺肯定傾斜環保股。
9. 滙控賣恒生：滙控(005)今年靠回購令股價翻生，明年相信亦有類似計劃。但何來咁多茄殊？高人認為滙控會繼續賣家當套現，其中恒生(011)肯定係最值錢寶藏，若肯割愛，肯定大把買家搶住要。
10. 「強迫金」改制：十個打工仔，九個半痛恨「強迫金」行政費超貴、回報又超廢，聽聞有勢力人士正醞釀大改革，不過阻滯甚多。萬南講嘅，如果邊個特首候選人搞掂呢壇大龍鳳，肯定民調支持極高，因為年中慳番唔少積蓄。
萬南
筆者為資深中環
金融界人士
[email protected]