湯文亮﹕如何奪取米芝蓮星
1 :
GS(14)@2016-11-17 11:37:05【明報專訊】有大廚話滷了一打鮑魚，足一斤重，送畀我夜晚寫稿時作為零食，約我在茶餐廳飲杯咖啡，我知道大廚一定有問題問我，我甚至知道佢想問我什麼問題。那名大廚的功力，在香港中餐行業，絕對可排在前五位，但是他有一件憾事，就是從未得過米芝蓮星，最初的時候我同佢講一些鼓勵說話，話佢一係唔攞，一攞就會係三星，大廚當然是非常開心，不過，年年都攞唔到，開心都變咗唔開心，於是，我的說話由鼓勵變成安慰﹕命裏有時終雖有，命裏無時莫強求，大廚黯然銷魂，今次搵我，九成九問怎樣攞米芝蓮星。
廚藝要好 餐廳位置要夠旺
大家坐低之後，我先問大廚有沒有興趣攞米芝蓮星，大廚話有，但沒有錢打通關係，最多可以攞200萬出來，我話要用錢，不過，不是用來打通關係，我再話，以我的能力，只可以幫佢攞到米芝蓮一星，二三星我就冇計。
我再問大廚是否知道米芝蓮一二三星定義，廚藝當然是首先要考慮條件，大廚話唔知，我話很簡單，三星是值得專程前往，二星是值得繞道前往，一星是值得順道前往，所以，要奪取一星，餐廳位置一定要在有人流的地方，此是廚藝之外首要條件。
店小菜精 真材實料街坊價
我對大廚話，既然佢已經準備200萬，就不如用這筆錢開一間小店，座位不多於20個，只供應幾樣拿手菜，例如蛇羹、小乳鴿、糯米飯、倫教白糖糕等，一定要真材實料，但價錢是街坊價，香港人很多都是食家，再加上大廚打正旗號，3個月內，我保證客似雲來，米芝蓮星探收到消息，試過，明年小店就會上榜。
大廚非常雀躍，話如果可以攞到米芝蓮星，送一晚給我，菜式任我訂，我話，不如將一晚營業額捐去一家慈善機構，大廚話捐夠兩晚，所以話，仗義每多屠狗輩是沒有錯的。
紀惠集團行政總裁
[湯文亮 敢說亮話]
來源:
http://www.mpfinance.com/fin/dai ... 6232&issue=20161117