大馬回流香港踎地黑帶杜汶澤一拖十踩場
1 :
GS(14)@2016-11-16 05:10:15曾經因為政治立場俾大陸網民炮轟，冇幾耐仲傳出被封殺嘅杜汶澤，雖然有指唔少國際品牌，又或者大陸嘅工作唔敢搵佢，不過正所謂「曹操都有知心友，關公也有對頭人」，世界咁大，總係有啱傾嘅對象，所以早前阿澤將工作重心移師大馬，喺當地開拍過幾套戲，最近回歸香港，開拍啲本土嘢！曾經講過對得起自己最重要嘅阿澤，遇到一啲社會議題，佢依然不平則鳴，好似日前人大常委會全票通過《基本法》第104條釋法，阿澤留言話：「好多人問我做乜呢兩年唔搞喜劇，又會有人話好想睇之類。我只能夠講聲對唔住。你有心情睇啫，我冇心情拍喎。」唔拍喜劇唔緊要，咪改拍其他題材嘅電影，咁樣先可以振興本地嘅電影業發展。最近努力籌備新片《空手道》嘅阿澤，因為講女主角鄧麗欣係空手道高手，0依家安排Stephy努力苦練，阿澤亦好勤力咁周圍去睇景。日前《蘋果》喺下晝4點左右見到阿澤帶住啲後生仔，一行10幾人喺中上環出現，嗰陣佢哋成班人喺條長樓梯行上行落，有啲人喺度密密寫，似乎係mark低啲街名同位置，阿澤就同幾個人指指點點周圍望，間唔中又見到佢拎部電話影低啲相，仲踎喺條街到度位，大約逗留咗45分鐘左右，佢哋先離開。事後《蘋果》向阿澤了解，佢話：「嗰日係去睇景，0依家啲劇本同主角人選都定晒，應該12月中左右可以開工。」前排阿澤喺網上招募小演員，唔知人選又搵咗未？佢話：「呢個細路仔要識空手道，又要識得做戲，所以有啲難度，唯有努力casting。」而阿澤自己都有學空手道，噚日佢仲貼咗張相，話自己苦練咗5年空手道，終於攞到黑帶，佢仲話：「在電影開拍前成功通過考試，意義更加重大。這不但見證了自己五年來的努力，更重要的是教練的一番心血！一條腰帶一度氣，我的空手道人生，才剛剛開始！」有網民喺facebook留言話黑帶好厲害，但阿澤就好謙虛咁話：「黑帶只係開始。」
來源:
http://hk.apple.nextmedia.com/entertainment/art/20161114/19833333