📖 ZKIZ Archives

小屋當皇宮 左丁山

2012-2-22  AD

美國人 expat阿拔為阿 Lin瘋狂，日日追問左丁山：「今日紐約對邊隊， Jeremy射入幾多分？」佢話返緊工，唔得閒睇電視，但你估左丁山又得閒睇波咩，只好 app阿肥仔 K攞料。
週 末到，阿拔搵幾位老友飲茶，大談波經，揸住張 WSJ（華爾街日報）嚟講， WSJ不以體育出名，但連 Time都將 Jeremy擺上封面，成為全美國話題，唔跟風都唔得。 WSJ講番華爾街證券行內有長春藤聯盟前隊員，如哥倫比亞、布朗、耶魯等畢業生，有幾位曾與 Jeremy對賽，曾嘜死佢，令佢只得四分，一講出來，就成為辦公室內明星，有人即刻計數，好似分析股票咁：「嘩， Jeremy射低 Kobe，你嘜死 Jeremy，咪即係可以嘜死 Kobe？做乜要在我地公司返工？」計死數咩，但各同事皆與有榮焉。
講完興奮事，講到沮喪新聞，就係唐英年九龍 塘住宅地下室僭建，眾人一致同意唐宅去年七八月間自行引爆，與其他高官一樣，道歉可以了事。但拖延至今，被有心人精心策劃爆料，連圖則都可以 keep幾年忍到唐生發表政綱之時先至擲出去，咁就弊傢伙啦，人地有預謀、有計劃、有步驟，一環扣一環，整個攻擊行動無懈可擊。睇番「明報」報導城大教員 協會主席謝永齡博士（屬泛民派）說：「你問求其一個職員都話驚咗佢。」唐生依家都識驚佢喇啩。
阿拔講到僭建，話唔係幾明白：「唐英年住宅地下室有 2200呎，好細啫，何解南華早報稱之為 Palace，我身家少亨利好多，喺美國間屋都有三千幾呎連埋地庫啦！」佢現在住在赤柱獨立屋，二千餘呎，佢覺得幾細，美國人嘅住宅在 2007年嘅平均面積係 2521平方呎，到 2010年減少至 2392平方呎（ WSJ 2/17），與香港平均住宅面積四百零呎相比，當然大得多。香港人住慣細宅，一千呎已屬係豪宅，對外國人講唐英年有 palace，因住俾人視為大鄉里。 WSJ講凱悅集團家族後人 Anthony Pritzker在 LA興建一間屋有 49,300平方呎，美式足球明星 Tom Brady間屋有 18,300平方呎！人地地方大，地價相當便宜，大屋零舍大過人，香港人住慣火柴盒，咪當 2200平方呎地下室為皇宮囉！


PermaLink: https://articles.zkiz.com/?id=31516
Next Page
ZKIZ Archives @ 2019