📖 ZKIZ Archives

僭建政治 左丁山

2012-02-23  AD

講講吓唐英年僭建，講劉秀成議員在 now電視台講地下室僭建，阿拔突然醒起，佢間屋邨可能有僭建，立即閉口不言，律師 W笑佢：「唔駛驚啫，你唔係名人；你唔會參與政治，你唔好發神經出嚟競選做區議員，就一定冇人理你。林鄭月娥局長講得好明白，知名人士住宅有僭建，經傳媒 報道嘅話，屋宇署先至會優先處理！」
唔，係嘞，香港周街有隱形富豪住在獨立屋內，屋內有埋隱形地下室，一啲都唔奇。見慣闊佬嘅證券 M就話港島區乜乜山，新界乜乜園，以至九龍塘，只要係有獨立屋聚集嘅地方，隱形地下室到處都是，見怪不怪，何以政府不理─要有人踢爆先至郁手，律師 W話屋宇署根本唔夠人手清查全港僭建，幾十年來抱着多一事不如少一事嘅態度辦事，咪只係關注現今俾傳媒點名嗰啲囉，而傳媒為咗新聞哄動，只會搵知名人士、 政客埋手嘅唧，故此愈係知名度高嘅人物，佢地要知道，佢地屋企有僭建嘅話，隨時曝光。
何解如此容易在獨立屋興建地下室？劉秀成教授在 now電視解釋，香港建屋嘅安全系數好高，起三層高嘅屋都打樁到石底，十分堅固，故此即使興建地庫從地底挖泥，都唔會影響獨立屋嘅結構安全，在美國反為唔 得噃，劉教授話美國獨立屋建於平地上，與香港唔同，反正美國加拿大獨立屋好多時都有地庫嘅啦！咁又係，左丁山以前到多倫多探訪朋友呂家明，印像中佢間屋嘅 地庫肯定不細於 2400平方呎。

 

因僭建而涉及誠信問題，有人要唐英年退選，乃人之常情，女子或者尤其感覺強烈，唔怪得葉劉 淑儀急急走出嚟話想入閘，但更奇怪嘅就係曾鈺成突然宣佈認真考慮參選。葉劉無關大局，不足掛齒，但曾鈺成係老愛國分子，根正苗紅，一旦下定決心，民建聯/ 工聯會一定全力支持，入閘無難度，如此一來，受到最大影響嘅反而係梁振英，好可能係中央意圖封殺梁生，等曾與唐競選其實即係俾唐生一個機會，此中情形，咁 複雜，我地唔識睇咯，加上王立軍闖入成都美國領事館之事，影響及薄熙來與習近平（據蘋果引述外電， 2/17），會唔會波及香港特首選舉，好難預料。

PermaLink: https://articles.zkiz.com/?id=31515
Next Page
ZKIZ Archives @ 2019