我不是百萬富翁 陳啟泰
1 :
GS(14)@2016-10-30 17:36:292016-10-05 EW
因為當上了銀行廣告特輯的代言人，《百萬富翁》陳啟泰（Ken）回歸，雖然平台已由熄了機的亞視，轉到facebook去，但穿得官仔骨骨、形象精明的他，問參賽者：「係咪最後答案？」的畫面，卻依然勾起了大家當年晚晚追看亞視的集體回憶。
「咁多年嚟，啲人搵親我拍嘢，都係《百萬富翁》。我明嘅，對香港人嚟講，陳啟泰，就等於《百萬富翁》；但對我嚟講，呢個主持只係一個角色，只係用嚟餬口，絕對係假嘅，我本身都唔係咁款嘅人。」
另一個外界誤會了他的是，到今年四月一號亞視停播當晚，他仍然是「亞視一哥」，仍然忠誠地流着亞視的血。「冇話『一』唔『一』哥，只係我同亞視嘅關係太密切。我，陳啟泰，過去呢十幾年嚟，有好多嘢都係同亞視掛鈎，我嘅名同利，我諗有百分之九十九，都係佢哋畀我！
「佢哋熄機之前『有糧出、冇糧出』嗰段日子，仲有好多人問我有冇事，其實我喺一三年九月已經約滿走咗，一直到家都係自由身。」
正正因為沒有了「《百萬富翁》陳啟泰」和「亞視一哥」的包袱，所以，今天的阿Ken，說起話來，似乎顯得更舒暢更舒服。
多得王征
四月一號晚，亞視正式停播，多年來被外界視為「一哥」和「忠臣」的陳啟泰，卻出乎意外地沒有見證這個電視時代終結的時刻。「我冇睇，但我當然知道最後羅霖嗰個樣，跟住變咗藍色啦，哈哈！」
他曾坦言並不可惜亞視倒閉，「我好早已經覺得亞視係一隻苟延殘喘嘅動物，早啲了結咗佢，反而會令好多人可以重生。」但不代表他對熄機沒有感覺。「熄機第二朝，我起身時同老婆講：『冇咗lu……』成個四月，我都好唔開心、好傷感！尤其係我每次去內地做嘢，廣東省啲酒店電視仲未校台，仲有個台叫『亞視本港台』，嗰個感覺更加難過！」
想亞視了結，但又覺傷感……「亞視從來冇對我唔住，裏面啲同事對我冇嘢㗎，係個老闆有問題咋嘛！我哋（他和一眾亞視員工）最嬲嗰個，都係王征咋嘛！因為亞視係佢一手拖垮！佢入主之前，亞視仲有自己嘅製作，就算收視得六點，都賺到錢、生存到喎，係換咗佢之後，所有嘢先一直向下滑咋嘛！
「香港嘅電視其實係有得做㗎！如果畀間亞視我去run呀，我會收零人工，有一點收視，就畀一萬蚊我，我覺得我咁樣都會發達囉！要用呢個品牌攞番五、六點收視，完全唔難！」
1╱陳啟泰為這個銀行廣告特輯，再次擔任《百萬富翁》式問答節目主持，令他成為了近日社交網絡熱話。「可以接觸到另一類觀眾群，幾好呀！」2╱阿Ken說，亞視之死，鮑姐鮑起靜比自己更難過和心痛。「鮑姐由麗的年代一直做到亞視，三十幾年，每次同佢講起亞視，佢都會喊。」
不要永恆
那麼，相信「亞視永恆」嗎？「我好憎！」他一臉不悅地說。「有人叫過我唱〈亞視永恆〉，但歌詞好有貶意，我點唱呢？全世界最冇可能唱嗰個就係我！我諗到死嗰日，都冇可能唱到出口！大佬呀，亞視畀咗咁多嘢我，好似要我咬佢一啖咁，唔係呀嘛？嗰段時間，我好唔開心外面好多人用呢件事嚟抽水，好似用人哋嘅痛苦嚟玩咁。」
阿Ken於九八年獲亞視重金禮聘由無綫挖角過檔，○九年九月曾一度離巢兩年，重返後至一三年九月，才正式完結彼此的賓主關係，有說因他那時不滿要跟王征到政總跳舞。「去政總跳舞，對我嚟講唔痛苦，只係我唔想家寶（葉家寶，前亞視執行董事）難做，我有去到，但冇上台、冇叫口號、冇揸橫額，只係到一到，畀盛品儒同王征見到我，我就即刻走。
「反而係一二年我同阿辰（林韋辰）要做一個喺香港播嘅綜藝騷，監製話老細要我哋講普通話，我同阿辰你眼望我眼，大家都覺得（續約）簽唔落手，先決定走。喂！你唔可以將喺香港播嘅節目，講普通話㗎嘛！好明顯佢（王征）係覺得世界係為佢而轉啦！如果我一一年簽約嘅時候，寫明係咁，冇所謂，我咪收另一嚿錢囉！」
打橫行街
離開了亞視後這幾年來，他主力到內地登台和商演，在香港曝光率大降，不怕被遺忘嗎？「其實廿幾年前，我喺無綫啱啱拍劇，做嗰啲行先死先嘅三、四線時，見到好多演員，唔知點解突然間失蹤兩年，喺香港完全靜晒，原來佢哋喺大陸拍嘢，跟住搵到嚿好大嘅錢，好勁！我嗰陣就諗：如果我可以做到，喺香港出到街冇乜人理我，但又搵得好風光嘅話，都幾開心㗎喎！
「呢樣嘢係我好大嘅夢想，所以呢幾年我少咗出鏡，我喺香港可以食茶餐廳，可以搭地鐵、搭巴士，可以通街打橫行，都冇人會理！我住喺（觀塘）功樂道廿年，我上兩個月先第一次搭嗰架由地鐵站去功樂道嘅綠van，以前我過唔到自己嗰關㗎，吓吓都要搭的士，但吓吓都六、七十蚊，好赤㗎嘛！ 家乜都搭，個人放開晒，開心到好似啲男人甩晒頭髮，然後決定一嘢剃光咁爽呀！」
但話晒曾經也是「亞視一哥」啊，長期鬧小生荒的無綫，應該也招過手吧！「有！有搵過我！我都想拍戲、想拍劇㗎，不過我自由身咗幾年，如果要我簽長約，呢個機會應該愈嚟愈細，但劇集、綜藝、旅遊嗰啲，都可以部頭㗎嘛，我係完全open㗎，啱我嘅工作，咪搵我囉！」
3╱跟（右起）林韋辰和朱慧珊在亞視多年來合作無數，感情深厚得如家人。「佢哋都係做嘢嘅人，只係遇着個唔好嘅老闆！」4╱當年《百萬富翁》首播，亞視出動巴士巡遊造勢，阿Ken（箭嘴）甫下車，群情洶湧。「《百萬》係○一年五月開始播，第一輯「百萬富翁之夜」第二日，做咗七份報紙頭條！」
賭場大佬
享受自由身，除了因為可以在香港生活得自在，亦因為可以接一些從未試過的演出。「我八月時去咗雲南一個月，拍咗套叫《芻狗》嘅電影，個內地導演三十歲未夠，係《我和殭屍有個約會》嘅超級粉絲，佢個腦好得！個故仔超冷門，講雲南同老撾邊界嘅地下賭場，我就係飾演喺香港着草去嗰度嘅賭場大佬，全普通話對白、現場收音，我每次殺完人就會噏一大堆廣東話粗口：『#@$%^%&^*&#@$#%$^%%&^()』嘩！我好開心！好開心！
「套戲報咗下年金像獎，所以會喺香港上，如果講呢個銀行廣告係我香港出山之作，我自己反而覺得呢套《芻狗》先係囉！我今日（做訪問）都係最想hard sell呢套戲咋，雖然呢套戲成本唔係貴。」
如此看來，阿Ken已到了不是「睇錢份上」的階段了。「老實講，好多年前，我嘅身家，已經夠我同老婆終老㗎啦！當然，我係絕對唔介意再多幾倍嘅！哈哈！」
而事實上，他早在主持《百萬富翁》前，已擁有了第一個一百萬。「我係逐蚊、逐蚊儲，冇炒過股票、冇炒過樓。我亦都幾慶幸我嗰陣有買 家住緊呢層樓，到 家我都差唔多供完。我同自己講過，五十歲之後，唔再買股票，總之要保本，零風險，就算基金嗰啲，都係要好穩陣嗰隻，我驚死、驚蝕晒呀！」
所以，今天的阿Ken沒有包袱，是有原因的。
5╱在內地新片中，他罕有地飾演一名會殺人的賭場大佬，每次殺人也會大爆廣東話粗口。「簡直係我一個難得嘅機會呀！」6╱片中角色造型滄桑，跟過往的斯文形象大相逕庭。「啲人問我點解個樣咁老，但係我好鍾意、好鍾意喎！」7╱跟老婆Cynthia結婚快二十年，至今仍維持二人世界。「佢同我一樣，都唔係個講究名牌嘅人，個人好踏實，呢方面同我一樣。」
Cheap
阿Ken畢業於加拿大渥太華卡爾頓大學的經濟系，他形容今天的自己，既是個愛追《愛?回家》的師奶，更是個cheap精，尤其是在衣着方面。
「自從離開咗亞視之後，呢幾年嚟，其實我都係日日着背心、短褲咋！哈哈！」但即使是內地商演、登台，也要裝吓身吧！「我好多都係淘寶㗎咋，嗰啲顏色好鮮艷嘅西裝呢，我喺香港唔會着，但我喺大陸會着，喺淘寶買，幾嚿水，着一次，我就唔要㗎啦！我仲要cheap精到，只係揀嗰啲『免郵』，或者係喺廣東省啲店（內地經理人公司所在地）先買，跟住我返上去做嘢，都會book啲中港車㗎嘛，每次咪成車、成車咁，直接車到我屋企門口囉，連郵費、順豐都慳番呀！哈哈哈！」
那今天他在拍攝的服裝店舖，買了一件白恤衫，應該是難得的奇景了！「我喺淘寶搵唔到個領位同質料咁靚嘅恤衫，仲要係呢個價錢（半價），好抵！可以着二、三十次喎！我真係計過先買㗎！所以我下次登台，件恤衫分分鐘仲貴過我套西裝加對鞋！哈哈哈！」
他可以逐蚊、逐蚊儲到一百萬，不是冇原因的。
8╱鏡頭前「百萬」look的他，私底下其實最愛這樣打扮。「所以我咪話《百萬》主持係假囉，我平時都唔會着西裝嘅。」
阿Ken有自身問題問大家，即掃QR Code上東周網睇睇啦！
撰文 周彩霞 攝影及錄像 何國豪 協力 Julio Miguel 服裝及場地提供 Hackett London 設計 吳俊彪