| ||||||
變，很難；但面對不變便會被淘汰的困局，要作出決定，更難。星巴克、麥當勞等大企亦要與時並進，放低歷史包袱，出apps讓客人透過智能電話消費，改變傳統模式，尋求突破。 教吹色士風的「音樂堂」，開業逾十年，儲落學生一大堆。即使老闆張志仁（張sir）甘心繼續「食老本」，每月穩賺十萬八萬，但他諗過：「不進則退！」故去年斥資廿萬搵人寫app，教吹色士風。他的app更是同類下載的首位，令學生人數激增四成，每月賺廿萬。生意上，張sir懂得變通，但在感情上卻非常遲鈍，因小事激嬲老婆，還要開口向記者求救：「點氹番佢好呀？」 中午的「音樂堂」學生人數較少，多為「一對一」教學，由張sir親自教授。採訪那天，張sir正向學生示範吹奏那英的《征服》。記者在旁，沉醉着那優美、沉實的中低音，心裡正哼着「就這樣被你征服……」怎料，學校的電話忽然響起，劃破了那刻的思緒。張sir衝去接電話，學生自顧自練習，張sir說：「無問題！我陣間再覆你，依家上緊堂。」再衝回來說：「唔好意思，我哋繼續。」他說：「自從搞咗app後，多咗好多查詢電話，反應真係唔錯，嚟緊可能要請多一個part time先得。」他尷尬地說。 張sir的app叫Saxophone all in 1，內容以圖解示範不同音的指法，不懂吹saxophone的記者看罷都略懂一二；也有Transposition Chart（轉調），張sir解說：「鋼琴同Saxophone個key唔同，呢個function方便啲學生睇琴譜時轉key。」這個app去年先後在蘋果App Store及Google Play上架，其後再在App Store推出收費十五元的進階版本，張sir滔滔不絕地說：「收費版本仲有調音器同拍子機，Android收費版會喺聖誕前推出。」 裝app三個月回本變陣指數：★★★★★ 張sir最初把app在App Store上架，須向蘋果繳付一百元美金。app的下載量其後愈滾愈大，Apple連Andriod全球總下載量逾十萬人次。其中免費和收費版下載比例為八比二，兩者更位列同類型下載首位，「音樂堂」每月從收費app中賺取萬多元。張sir說：「一萬幾千，唔算賺咩錢。」app只是「餌」，他於app中加入音樂堂的連結，果然令學生人數及盈利一年增四成。app並無方法宣傳，主要靠用者好評來推廣，好app就是畫面簡單易上癮。「我個app淨係教單音，令初學者易上手，如果佢想學吹一首歌，都要搵老師學。」張sir說。張sir見app流行，早已心癢癢想整一個。市面上一般app每個版本收費約五至二十萬，剛巧他一名做IT的學生提出以「友情價」替他寫app。「四個版本（Apple、Andriod的免費及收費）廿萬全包喎，我一口答應啦。」張sir說。雖則「全包」，不過張sir亦不能「繑埋雙手」，原來app中的每一粒音，都由張sir親自吹完再錄，交予其學生，由於教班已經十分忙碌，故花了近一年時間，app才能面世，之後還要不斷更新，張sir說：「要調音器更準、速度加快，仲要加強流暢度，原來要成日睇住個app有咩問題，每update一次最少都一千蚊，前後都update過五次。」 張sir也試過在Yahoo買搜尋字眼廣告，但時代瞬息萬變，原來此方法已out：「效果唔明顯，而且一個月要千五蚊，一年萬幾蚊，收費唔平，唔似app有得玩，又唔hardsell。」學生Jason曾在工聯會學色士風，想找更專業的教室，他就是留意到這個app才認識「音樂堂」：「見個app搞得幾pro，就決定嚟呢度學，就係咁簡單囉！」 搞「速成班」賺錢一條龍變陣指數：★★★ 張sir雖然為「音樂人」，但他不是齋講理想，也很現實為錢打拼。回想從前貧窮的日子時，張sir仍心有戚戚然：「嗰時屋企窮，為咗學色士風，要自己做兼職。十八歲一畢業出來做會計文員，得五千元人工，夜晚去做臨記。」死慳死抵，張sir兩年間儲了十萬元與表弟一起做直銷，可惜二人遇人不淑，一鋪清袋。又試過搞補習學校，因信錯拍檔而失敗，更欠下十多萬，花上幾年時間才還清。既然有一門手藝，十年前張sir於是開設「音樂堂」，這些年來已儲落不少熟客，但他仍不滿足，經常度橋務求增加生意額。除了搞比賽、表演等，亦搞「速成班」，讓客人彈奏一曲求婚及追女仔，更試過邀請日本著名色士風手小林香織來港到九展開騷，張sir憶述：「製作費、表演酬勞連雜費使成一百萬元，入座得七成，搞咁多嘢都只係收支平衡！」其生意真正的轉捩點在○六年，本來只教班的張sir，開始生產自家品牌的色士風：「有個學生支色士風壞咗，拎去整等成兩個月，佢唔學住喎。嗰兩個月我無學費收呀！心諗：『佢支色士風咁渣o架！』不如我自己生產啲好質量嘅色士風好過！」張sir計過有學生已表明幫襯，故找來一位日本設計師幫他設計色士風，再到台灣找工廠生產。「台灣有好多生產色士風的廠，不過整個投資要過百萬，改一粒掣、整一個模，下下都要五萬，一次生產最少五十支，仲要成日飛去台灣開會。」現時共有兩款自家品牌的色士風，售價分別為八千至萬八元。「萬八蚊嗰支搵工匠handmade，所以咁貴。」由於色士風不同鋼琴，可以租用、共用，他大部分學生都會跟他買，「如果係比較窮嘅學生，會俾佢哋分期付款。」張sir說。色士風每年銷量約二百支，佔總營業額三成。除了香港，亦有澳門、台灣及新加坡的客人，透過其網站向他訂購。「依家準備緊喺日本Am azon賣添 忍痛斬纜專攻色士風變陣指數：★★★★ ★張sir 儲夠錢開鋪前，曾在通利、柏斯等任兼職導師「儲學生」：「三年裡面都累積咗四十個學生，月入兩萬幾，幾穩定。」終於夠錢夠學生開設「音樂堂」，他又怕色士風冷門，於是找來不同導師教鋼琴、結他、小提琴及打鼓。不過教落才知鋼琴等主流樂器「好睇唔好食」，「出面好大競爭，邊度夠通利、柏斯、青苗呢啲大行爭。學費唔收得貴，仲要同導師分。」當時，學習鋼琴等樂器有五十多個學生，但張sir決定斬纜，「色士風較冷門，但係呢片土地冇人爭。」時間證明，這是一個正確的決定，現時「音樂堂」月費介乎六百至二千三百元，學生人數達五百人，除他擔任導師外，亦有五名兼職導師。記者見張sir對着學生幾乎無脾氣，「佢哋吹得唔好，淨係同佢講：『你今堂吹得麻麻喎！』唔好再打擊佢哋，有心嘅就會返來練，我同啲學生好老友o架。」張sir笑道。今日的張sir處理生意甚懂變陣，對人又圓滑，但對着太太卻「無晒符」。張太本來是他學生，採訪期間，記者見他間中悶悶不樂，他透露原來與新婚不久的太太鬧交，已經幾日不見，「其實為咗表演服飾嘅小事。不過嗌交時講啲好難聽嘅說話，都唔知點氹番佢好？」直至本週一，他太太於葵涌運動場表演，記者要求前往拍照前，張sir才的起心肝，主動找太太言 開業資料（12/00） 租金$40,000 ^裝修$250,000入貨$100,000雜費$10,000總投資$400,000^三個月按金，一個月上期 營業資料（09/13） 營業額$350,000 #租金$20,000入貨$120,000雜費$10,000盈利$200,000#已扣除五位樂器導師的拆賬 一點意見聶子明（Tom） 現為日本時裝水貨店VELVET老闆之一，兩年前推出app讓客人落單，月賺四十萬，鋪頭七成半的訂單來自app。Tom指出，現時人人一機在手，app已成為大趨勢，讚音樂堂可以跟到潮流。「乜嘢行業有app都會有優勢，冇app都要有個mobile platform啦。」他認為，成功的app最緊要容易上手，版面設計清晰。「張sir的色士風app簡單易用，能夠吸引初學者，不過似乎欠缺互動元素，加番啲簡單的interaction功能，等大家可以交流吓心得、樂譜sharing等等，令個app再好玩啲。」 | ||||||