智取大市：I.T越執笠越興奮
1 :
GS(14)@2016-10-26 08:01:33香港地唔少人當沈嘉偉神咁拜，佢間I.T（999）自然有神奇之處。你睇香港間間I.T門市都拍烏蠅，香港業務越蝕越多絕對唔令人意外，內地業務平平穩穩之餘，令人驚喜係5年前用2,000幾萬買落嘅A Bathing Ape，帶動日本業務啱啱呢半年賺成億幾返嚟，業績報告暗示遊日港人去到日本買A Bathing Ape，成為日本業務增長動力，條橋同沈生早年帶Dr. Martens水貨嚟香港賣、然後發達嘅方程式有異曲同工之妙，真係唔寫個服字都唔得。香港I.T門市開始廢武功之下，你應該見佢越執多幾間，就越興奮，因為香港呢頭蝕少咗，沈生嗰頭一定有條新橋幫你賺錢，一定唔會死錯人。I.T股價由低位1.7元升到3.12元，現價去博，就係信沈生會帶埋你一齊翻生。另外，通達（698）剛剛公佈第三季營業額按年增長49%，遠超之前20%左右嘅增長速度，消息刺激股價周二升半成，預測市盈率低過15倍實在吸引。不過龍頭瑞聲（2018）啱啱先畀大摩downgrade，股價弱勢話唔定波及一眾手機設備股，睇吓通達稍後會唔會有低吸機會。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20161026/19812134