📖 ZKIZ Archives

就業就是扶貧 左丁山

2012-2-7  AD

蘋果日報在二月二日 A9版新聞：「滅貧不力，港回歸後急增十萬窮人」，主力係批判財政司司長曾俊華，引述學者黃洪與鍾劍華所指香港貧窮惡化，政府扶貧「越扶越貧」，似乎執梁振英嘅口水尾。
記 者寫稿時，不知有無參考一啲數字先至落筆，首先界定何謂貧窮。根據社會服務聯會嘅「貧窮」定義，個人收入低於個人入息中位數一半以下，可定義為貧窮人口； 收入低於家庭入息中位數一半的家庭，可定義為貧窮戶（家庭）。好嘞，社聯根據政府統計處數字推算， 2011年第一季最低收入嘅第一組，個人入息中位數字五千五百元；第二組嘅中位數係七千元；中間收入嘅第四組至第六組嘅收入係一萬、二萬、一萬四千元。咁 用邊一個中位數去計算呀？個人收入低於二千五百元？低於三千五百元？還是低於七千元？左丁山唔知，姑且接受社聯發表嘅香港貧窮人口數字─ 2011年有一百二十萬四千四百人，佔 2011年中期人口七百一十萬八千人之 17.5%。相比之下， 2001年有貧窮人口一百一十四萬九千人，佔 2001年中期人口六百七十二萬四千九百人之 17.1%，貧窮比率其實相差無幾。由 2001至 2011年，香港人口增加咗三十八萬三千一百人，貧窮人口增加咗五萬五千四百人，即係話，在新增人口之中嘅貧窮率係 14.5%，低於整體貧窮率，而主要新增貧窮人口年齡組別（社聯數字）係在四十五至六十四歲之間，十年增加咗九萬五千二百人，照計呢個組別嘅人口係中年人 主力工作組別，今日全港失業率只得 3.3%-3.4%，周圍有工冇人做，呢個組別點解佔了最多窮人呀？此當然與人口結構有關，但即使在此組別，貧窮率已由 2001年嘅 17%下降至 15.9%。再講數字，讀者會睇到悶㗎嘞，應該係由啲學者向「蘋果」年青記者解釋先至啱，唔係在一個專欄內用六七百字去講解。從社聯嘅數字推論，香港係有 貧窮人口，但不可以達成「越扶越貧」嘅結論。政府就業數字顯示，目前全港就業人口有三百六十六萬二千人，佔人口 51.5%左右，係歷史新高，佔咗 20至 64歲工作年齡人口（四百九十一萬）之 74.5%，近乎全民就業，呢個數字先至勁呀！

PermaLink: https://articles.zkiz.com/?id=31187
Next Page
ZKIZ Archives @ 2019