📖 ZKIZ Archives

不能閉關 左丁山

http://hk.apple.nextmedia.com/template/apple_sub/art_main.php?&iss_id=20120111&sec_id=12187389&art_id=15971251&cat_id=255&coln_id=22

「港人港地」政策本算係保護主義，直接鼓吹分隔香港人與內地人，在一國兩制大原則下，偏重兩制。基本法草擬時，考慮政治因素大過經濟因素，八十年代中英談 判香港回歸細節，中方主要着眼點係穩定香港人心，防止大規模移民，同時又要防止特區政府他日失控，唔聽中央話，故此應承馬照跑、舞照跳，五十年不變，港人 治港、高度自治嘅同時，在政制上處處設防，設立功能組別，立法會分組投票點票，民選議員部份要用比例代表制，結果就係香港政治體系係畸形嘅，行政主導之下 政府無立法會票，功能組別及分組點票保證咗立法會分裂，易成僵局，無論甚麼人做特首都難以強勢。
經濟方面，香港與內地有充份交流，領略內地十三億 人之中沿海人民先富起來嘅威力，要等到 2003年推出自由行之後， 2009年香港經濟如一潭死水，百業不振，董特首與北京傾妥自由行，自此內地人可輕易簽證來港旅行消費，入境產子，於是零售業市道大躍進，樓市騰飛，一直 至今日。今天有人大叫吃不消，對內地人來港搶貨，患上眼紅症及畏懼症， D&G事件輕易觸發一場千人抗議行動，較深層次矛盾就係一啲本地人不滿意內地人大量消費帶來之昂貴舖租，高租金高樓價在旺區已在趕走本地非黃金珠 寶租客及本地中產往新界區，情況正如本土倫敦人根本住唔起倫敦市內。
香港正面臨抉擇，我地要實施「港人港地」政策所代表之保護主義，將香港人與中 國人一分為二吖，還是勇敢面對新變局，繼續堅持開放，歡迎所有境外人士來港投資、消費？左丁山堅決認為未來特區政府要認識清楚，政治上法律上可以一國兩 制，但經濟上，中國內地十三億人，香港得七百萬人，內地消費大軍來港，簡直係投鞭斷河（或者係銀紙填平維港），香港斷難抗拒經濟上只有一國，香港只能順住 形勢發展自己優點，將香港變成中國嘅最大真正世界城市，先至可以滿足新一代（ 80後、 90後， 00後）嘅成長需要，千萬不能排擠外人，搞港人港地一類封閉政策。

PermaLink: https://articles.zkiz.com/?id=30569
Next Page
ZKIZ Archives @ 2019