最高危上市公司 你懂的 高仁
1 :
GS(14)@2016-08-09 07:46:512016-08-09 HJ
繼3月細價股孖展斬倉風潮後，7月底有一隻細價股遭到沽空機構狙擊，單日股價跳崖式暴瀉近九成，引發了「火燒連環船」的效應，同一莊家的多隻細價股被連環斬倉。「高仁指點」話你知，高仁的「豬狗朋友」對事件亦相當關注，一起探討最高危的香港上市公司。
在披露對話實錄之前，請各位「巴打」與「絲打」重溫人物背景，簡介如下：
戴孤劃──又稱為「戴Sir」，《信報》「蠱壇辨虛實」專欄作家，上市公司大股東，經常欺壓小股東；
沈繼司──核數師，熟悉會計制度、對數字敏感，但對外面世界一無所知。
高 仁：最近有一隻細價股畀沽空機構狙擊，單日股價高台大插水，引發細價股火燒連環船被斬倉，相信睇到各位「巴打」一目一驚心。
戴孤劃：唉……香港最近呢幾年真係風雨飄搖，既有上市公司股東抵押股票被斬倉，又有著名富豪飯堂嘅兄弟爭產案，而家仲要搞多一單細價股暴瀉事件。你哋覺得邊一類型嘅上市公司最高危呢？
沈繼司：以我嘅經驗嚟睇，應該會係民企。
高 仁：我都知阿媽係女人……
沈繼司：Mmm……我諗老公同老婆一齊打拚捱苦出嚟，果啲上市公司應該會係最安全。夫婦同心，其利斷金嘛！
戴孤劃：咁又未必，要睇返上市公司係咪做得好喇。如果做得唔好，上市公司就會安全啲；相反，如果做得好，上市公司就會好唔安全。
沈繼司：點解嘅？
兄弟血緣親疏有別
高 仁：你咁都唔知！？因為，老闆通常有錢就會身痕，就算老婆靚唔靚都冇乜關係。
沈繼司：咁「老豆」把上市公司傳畀嗰仔，呢啲上市公司應該會安全嘞啩？
高 仁：咁要睇吓「老豆」有冇「福氣」，只有一個仔嘅上市公司就相對安全啲；相反，「老豆」愈多仔嘅上市公司，就可能會愈危險。
沈繼司：「老豆」愈少仔愈有「福氣」？我唔明喎……
戴孤劃：（普通話）因為，要看看他們是哪一種的「鐵哥們」（高仁註：戴Sir又賣廣告，意思解作兄弟）嘛！「鐵哥們」的血緣親疏是有分別啊！
高 仁：戴Sir講得冇錯呀。以燒鵝馳名嘅「富豪飯堂」，第二代同房兄弟都會因股權問題反目，母公司要被迫清盤；另一間「富豪飯堂」兄弟姊妹係同父異母，股權梗係爭崩頭；又好似我哋而家食飯嘅唯一上市茶記，「巴打」股東合作近40年，奶茶、奶油豬做到出晒名，亦都疑似內訌醞釀賣盤。
沈繼司：OK！OK！咁邊類型民企會較安全呢？
戴孤劃：如果民企手頭有錢，控制公用事業或知名品牌，代表業務穩定，相對較安全。仲有，如果民企老闆有頭有面，亦會相對較安全，因為爆煲會有名譽損失嘛。另外，老闆年紀老邁，亦會相對較好。
沈繼司：戴Sir嘅分析都啱嘅，幾十億以下嘅地區性民企可能係最恐怖，尤其係來自出名造假數嘅福建省。
高 仁：係咩？好，等我搵Daisy幫手做吓research先。
本欄逢周一刊出。
歡迎交流上市公司的財技個案及招數，請電郵至
[email protected]。
?
#高仁 #財經拆局 #財圈識真假 - 最高危上市公司 你懂的