📖 ZKIZ Archives

大學賺錢 左丁山

2012-01-05  AD

本地大學為迎合社會之學歷需求，辦咗不少「自負盈虧」嘅文憑及非研究之碩士課程（碩士 MA多是上課，交功課，唔駛做研究嘅；哲學碩士 M. Phil就係教資會付款津貼之研究生課程），呢類自負盈虧文憑及碩士課程大受歡迎，因而各大學加加埋埋，賺咗唔少錢。賺錢條數好似好易計，學費收入減除宣 傳推廣成本，教師授課成本，課室租金，講義成本等等咪係囉。但仔細研究下，大學課室係教資會或政府撥款興建嘅，教師（教授）薪酬係公帑支付嘅，教授拿了薪 水，如何將佢嘅時間成本在學士課程、哲學碩士課程與碩士課程三方面劃分？大學招牌係收生保證，「招牌成本」（ brand cost）又如何劃分？睇落都幾煩，各大學盤數要分拆得非常細緻，否則幾容易俾審計署將軍！
左丁山並非因此反對大學賺錢，大學冇錢嘅話，最終受害 者一定係學生與研究計劃。有議員質問大學賺錢係為乜，幾唔用腦，大學係非牟利機構，有校董會及廉署睇實，大學賺咗錢唔會入到私人口袋，留在大學做儲備，始 終都係用於教學與研究嘅啫，香港本地大學愈係多錢，香港愈係能夠吸引世界人材來港，建設未來香港。
柏克萊雖然呻窮呻到樹葉落，佢嘅每年預算仍然高 達二十三億美元（比幾年前已削減十億美元），相等於一百七十九億四千萬港元，比較香港八間公立院校之三年四百四十二億港元，一間柏克萊每年用錢多過香港八 間（中大、港大、科大、城大、理大、浸大、嶺大、教育學院）每年加埋。可以咁講，香港每間大學用錢相當克己，但國際排名有番咁上下，納稅人嘅大學投資回報 率相當高。

 

立法會議員（民主派與民建聯）唔知有乜動機，兩次在財委會否決政府之 2012-2015年大學撥款，教育局仲未識驚，但如果到咗五六月財委會仲唔撥款，各大學在新財政年度（七月一日開始）如何是好？議員要求政府承諾以後不 增加大學學費，係強人所難，香港嘅大學學費唔算貴，每年四萬二千五百元，比柏克萊之州內學生學費（ in-state tuition）一萬二千一百九十二美元便低得多，已有多年未調整，好心啲尊貴議員唔好玩啦！

PermaLink: https://articles.zkiz.com/?id=30448
Next Page
ZKIZ Archives @ 2019