ZKIZ Archives


法證算死草鄔碩晉

2014-03-13  NM
 
 

 

屍體會說出真相,所以有法醫;數字會說出事實,所以有法證會計。不管刑事或民事訴訟,由洗黑錢、離婚到合約糾紛,涉及金錢,就要法證會計出馬。

鄔碩晉,做過「Big 4」的普通會計師,過去十幾年,轉攻法證會計,意外地走進另一個世界,在冰冷的數字中,鬥智鬥力之餘,更見盡人情冷暖。鄔碩晉接得最多的是離婚案,儼如離婚專家,最叻計算身家及贍養費,已婚或未婚男女,定可從文中學到幾招傍身。不過,招數是死的,人是生的。「埋牙」時,數字上合理,感情上卻過不到,鄔碩晉一語道破:「離婚案最難搞。普通商業糾紛,條數啱,收到八、九成都算啦,離婚唔同,收少一分錢都追到底!」

近年較具爭議性的離婚案,一定要數恆豐酒店家族後人李建勤與前妻曾昭穎,因分身家金額鬧上法庭,鄔碩晉曾在原審時參與此案。原審法官判曾昭穎可分到十四億元,但今年一月,上訴庭裁決,將金額大縮水至四億元。案件關鍵在於李建勤的日本地產生意,是由父親打本,而且二人曾簽訂協議,父親有權以一元購回生意。原審將該生意計入李建勤身家,但上訴庭卻指生意實為父親持有。峰迴路轉,亦凸顯出離婚案的複雜性。清官難審家庭事,古今通用。當中更存有不少灰色地帶及謬誤,由鄔碩晉一一解答。

離婚最難的運算

記:記者鄔:鄔碩晉記:在離婚案件中,法證會計的工作是什麼? 鄔:男方及女方各分到幾多成身家,由律師去爭取,法官決定,而個餅有幾大,就由法證會計計出來。記:如果男方的生意是由家人打本,會否計算入家庭資產?鄔:會。生意價值係男方的資產,而家人打本係負債。只要有借款協議,即可將資產扣除負債,然後才計算家庭資產,女方則有權分。記:相同的證據,兩個法官為什麼會有不同的解答? 鄔:每個官嘅標準都唔一樣,法律係有個基礎,但大家都唔清楚判幾多時,就靠法官嘅直覺去判。你問我法律係法治定人治,經驗話我知係人治。記:富豪慣以信託基金持有家族資產,身為受益人的第二代離婚時,如何計算家庭資產?鄔:家族信託基金係咁多資產中最難計嘅,因為涉及「酌情花紅」(discretionary bonus)。呢種情況,一般根據每年收到嘅股息,計算應佔權益。有時男方想女方分少啲,就話自己控制唔到信託條款,只係二十個受益人之一,分到二十分之一;但女方想分到男方多啲嘅,就會話你係大仔,應該分到十分之一喎!

分身家遊戲

記:有指富豪為防分身家,會立下婚前協議書,是否常見?

鄔:至今香港都好少案件係審判婚前協議書嘅。曾經有一單,法官喺判決書講,你結婚前一晚先簽婚前協議書,係無用嘅。佢意思係《合約法》規定,有壓力下籤訂嘅合約,可以是無效嘅。你第二日結婚,前一晚先簽梗係有壓力啦!

記:分身家和贍養費有何分別?

鄔:分身家係一次性,贍養費係月供嘅,分咗身家就無贍養費。贍養費嘅前提係維持離婚前嘅生活質素。但記住,離婚前男方有俾女方家用,女方先可以要求有贍養費,如果女方財政獨立,與男方有相同嘅賺錢能力,就不會有贍養費。因為贍養費是由收入多的一方,給收入少嘅一方。另外,仲要睇男方嘅財政狀況,好像iBanker,收入大,但支出亦大,儲唔到錢,你分他身家無用,記住要贍養費!

記:計算贍養費時要注意什麼?

鄔:有些女人以為離婚前一個月狂買名牌,谷大生活開支,就可以拿多啲贍養費,但其實法庭係要睇過往兩、三年嘅記錄。另外,買樓、買股票係資本開支,亦唔計。最麻煩係如果太太有事業,好難分開佢嘅商務開支及生活開支,而男方只會負責後者。

記:為什麼離婚案最難搞?

鄔:一旦涉及私人感情,當事人睇數字都加咗主觀成分;例如分身家時,客觀證據指家庭資產得一千萬,但女方咬定男方隱瞞資產,理由可以係 「佢成日飛去柬埔寨,嗰邊一定有間公司!」你點查?最長嘅離婚案可以拖拉十年,其實唔係金錢上嘅拖欠,而是情感上嘅拖欠,令當事人作出唔合理假設,特別容易糾纏。但法律只係解決問題,而非發現真相。

記:你自己對婚姻有何看法?

鄔:兩個人最開心嘅時間,未必係結婚後,你寫呢句,我老婆睇到實鬧我,呵呵!現今社會富裕,婚姻可以係分錢嘅遊戲。你睇南豐集團創辦人陳廷驊,就算立咗遺囑,想捐出九成五身家,但老婆呈請離婚分身家,當時老公已有腦退化症一樣可以。絕唔絕?絕o架!法律係一場找空位打嘅遊戲。好多客都係結婚二十年以上嘅,有啲不能共富貴,但更多係發覺大家興趣唔同,唔想再同對方生活。當年「電器大王」蒙民偉都係七十多歲先離婚。

數字緝兇

法證會計並非只懂得計身家,還會參與各類牽涉金錢及商業罪行的刑事或民事訴訟。上週五,伯明翰環球(2309)前主席楊家誠,洗黑錢罪成,被判入獄六年。審訊過程中,控辯雙方對案中多筆款額的計算,有很大落差。鄔碩晉坦承,有時法證會計都係靠「估」。記:楊家誠洗黑錢案中,控方估計楊家誠在○一年炒股賺了十萬元,辯方卻指其實有過千萬。雙方的法證會計報告,為何分別如此大?鄔:十三年前嘅文件已唔存在,法證會計師只能靠估,而估又有好多種方法。通常都係將年初嘅戶口結餘及股票價值,減去年尾嘅戶口結餘及股票價值。有行家試過話個客人一年炒股嘅回報率係八成,點計呢?原來佢喺客人過去一年嘅買賣中,抽十五個出來計全年回報。其實係斷章取義,要睇法官信唔信。

記:法證會計如何蒐證?鄔:我哋要自行蒐證去支持報告內容。方法有三種,一係由第三方提供單據,例如銀行、供應商;其次係訪問證人、第三方,如銀行職員等;有啲案件仲要去實地考察,例如睇工廠有冇運作。試過有一次,有間公司懷疑印巴的分公司有人造假數,請我哋去調查。一般案件我可以扮做核數師,入公司調查,但呢啲國家從來唔需要核數,結果我哋要扮成投資者,飛去當地做盡職審查。雖然同管理層夾好,較容易入手,但都要度好劇本、場景、對白,與當地嘅線人裡應外合,偷偷俾我哋影印文件、抄電腦資料,好大壓力o架!記:如何找出造假賬的公司?鄔:有啲不合邏輯嘅經營模式,其實唔難發現,例如一間公司盈利好好,但無應收賬、存貨、應付賬,已經好唔合理。好像十多年前嘅歐亞農業(已除牌),專門賣花去歐洲,營業額大、盈利靚,但有人搵到當年由中國飛去歐洲嘅空運記錄,就算用盡冷凍貨箱,都無可能運到咁多花去歐洲。從不合理現象中,抽絲剝繭,搵到合理嘅數字,即事實,就係法證會計最好玩嘅地方!

PermaLink: https://articles.zkiz.com/?id=92984

Next Page

ZKIZ Archives @ 2019