ZKIZ Archives


財經評論:新地越旺郭炳湘越愁

1 : GS(14)@2016-05-19 02:21:38

近期新盤市場似乎只有個別財團搶到購買力,唔使多估,講緊嘅個別財團就係新地(016)。一個何文田豪宅盤天鑄2期加一個將軍澳海天晉,前者至今累售超過210伙,平均每個單位售價超過4,000萬元,套現超過90億元;後者不足一個月內累沽逾400伙,套現約35億元。兩個樓宇盤加埋套現了135億元,數字上已經差不多等同該集團的中期純利(新地截至去年12月底止中期純利為147.24億元)。講到散貨能力,新地的的確確有「自己方式」。不過,有別於以往九龍站天璽大玩送稅,成功引來市場跟隨,到現時都繼續用,但今次天鑄2期同海天晉賣到好成績,都幫唔到整個市場氣氛,其他一手樓繼續慘淡。而諷刺的是,最慘淡嗰位,就是離開了新地,另起爐灶的長子,人稱「水哥」的郭炳湘。自從郭氏兄弟2008年爆出內訌,至2014年初正式結束在新地董事局的23年歲月,郭炳湘明顯一直謀求一個「反擊」機會,以私人身份拍住長實地產(1113)合作發展馬頭角豪宅君柏,想喺2016年力爭響頭炮。點知到現時一個單位都無賣過,出完價單都要煞停,對比起自己老家的天鑄2期,單位清得七七八八,已經套現超過90億元,真係「喊濕幾個枕頭」。翻身機會其實唔係無,2012年底拍麗新(488)聯手投得將軍澳地,聽聞想今年內賣樓花,自己老家同區已經得番一個堆填區項目日出康城4期。之不過,今次個拍檔麗新,對上一次賣樓已經是2012年賣單幢樓Ocean One,仲曾於2013年中售樓說明書出錯,需即時叫停項目。水哥到底會是被拍檔「水」多次,抑或可以喺自己兄弟面前威番次,市場人士,特別是新地一眾老臣子,都應該入定花生等睇好戲。記者:黃嘉銘





來源: http://hk.apple.nextmedia.com/financeestate/art/20160516/19613411
PermaLink: https://articles.zkiz.com/?id=300218

Next Page

ZKIZ Archives @ 2019