📖 ZKIZ Archives

香港舊人傳記字典 左丁山

http://hk.apple.nextmedia.com/template/apple_sub/art_main.php?&iss_id=20111218&sec_id=12187389&art_id=15903262&cat_id=255&coln_id=22

來自華盛頓的美國律師到內地公幹，上飛機前搵賓架 P，要求代訂陸羽飲茶，賓架 P叫左丁山訂位，當然照辦。呢位律師 A自一九九七年到陸羽搵位被拒後，對陸羽着咗迷，每次有機會來港，都會去陸羽飲茶，連張點心紙都攞番華盛頓做紀念品，無他者，外國人來港見到有超過七十年 歷史嘅茶室，自不然想知多啲，外國人到中國做生意，事先睇埋一啲英文書，例如 How To Do Business in China之類，但係呢啲書只屬皮毛。例如呢日佢一坐低，問起李嘉誠，佢已經知得好少，問吓 David Tang（因睇 FT專欄），就知道佢對香港舊事無認識。
賓架 P打張好牌佢上，話香港大學出版社出咗一本新書，叫做 Dictionary of Hong Kong Biography， edited by May Holdsworth and Christopher Munn，買咗之後，可以知道香港好多舊人物與舊事，例如鄧永鏗嘅祖父鄧肇堅爵士。呢本書邊度有得賣呢？左丁山去過中建大廈嘅 Dymocks，唔見有噃。賓架 P話：「去大書局啦，九龍辰衝、中環香港圖書中心吖嘛！」兩間即係一間啫，彼此相通嘅，飲完早茶就帶律師 A行去安樂園大廈地庫嘅香港圖書中心，雖然好近文華酒店，律師 A話未到過。呢間書局服務好好，即刻搵到，書架上有三本，我地一人一本，買咗先，價錢並不便宜，五百零頁，賣四百九十五元。

 

呢類書供參考用，平時唔會睇嘅嘞，但要搵番香港幾代前嘅名人資料，呢本書確實資料詳盡，譬 如劉鑄伯（ 1867-1922，第 246頁），就係屈臣氏買辦，保良局、東華三院總理，廣華醫院創始人之一。關於何東（ 1862-1956）就更寫得詳盡，有關十九世紀之英國人在香港嘅故事佔了不少篇幅，現代人有李小龍、林黛等等。如果要搵一本英文書關於香港舊人舊事嘅 話，呢本應該係最權威，報館資料室起碼要有一本啦！今天之年青記者對舊事認識少，不求理解，上星期睇「蘋果日報」講選委會選舉，提到高等教育界，將中大榮 休教授閔建蜀列入內地學者之列，錯得離譜，閔公係新亞書院學生，未畢業就攞獎學金去咗佛萊堡大學（ Freiburg），曾師從海耶克，得博士學位後到新加坡大學教書，後返回新亞做教授直至退休，點計都算係本地學者啩？

PermaLink: https://articles.zkiz.com/?id=29981
Next Page
ZKIZ Archives @ 2019