財金冒險號：今年尚有四大驚奇
1 :
GS(14)@2016-04-15 16:27:20每年之始，金融界總要預言「十大驚奇」，小生中途加把口，估計今年尚有四大驚奇：1.聯儲局6月加息。根據利率期貨，美國6月加息的機會僅14%。單睇美國就業及通脹，早有條件溫和加息，遲遲未加，藉口係中國經濟不穩及油價低迷喎。好嘞，中國3月份經濟數據全面勝預期，油價創今年新高，美元又弱，現時唔加，唔通等11月總統大選前後至密集加兩次咩？2.歐洲再遭恐襲，英國脫歐。歐洲左膠政府當道，亂收假難民，真．恐怖分子混入，法國、比利時接連被襲，難保唔再出事。英國6月23日公投表決是否脫歐，萬一呢兩個月爆多一鑊，歐盟嘅難民政策肯定成眾矢之的，英國就脫硬！3.美國亦爆恐襲，特朗普當選總統。特朗普排外、反伊斯蘭，目前係共和黨初選大熱，出閘後贏唔贏到民主黨，就睇未來半年伊斯蘭恐怖分子動向，如果敢郁美國，就等於幫特朗普拉票。4.香港樓市年底減辣，反而加劇跌勢。香港樓市跌勢已成，地產界叫政府減辣。「3D辣招」自2010年底至2013年初先後推出，樓價升到2015年中至見頂，既然辣招無阻升勢，減辣又豈能止跌？只怕一撤SSD，近三年買樓者鬆綁，供應湧現，落井下石。咪住！點解四大驚奇無中國份？中國無奇不有，暴力救市、熔斷彈弓手、債轉股飲鴆止渴，層出不窮，仲有乜嘢講得上驚奇？笑笑生
mailto:
[email protected]本欄逢周五刊出
來源:
http://hk.apple.nextmedia.com/financeestate/art/20160415/19571573