2011-12-09 AD
每年到咗年尾時份，報紙必有例牌新聞，就係中華電力（中電）與香港電燈（港燈，現稱電能）向政府申請來年調整電費，跟住就有關注組抗議加電費，有議員大駡 兩電無良，有環保團體出來指責兩電不減排，污染空氣，電費結構鼓勵浪費電力等等。如果我係資深報紙編輯，大可以將前幾年嘅新聞稿從電腦抽出嚟，係咁意 cut and paste，改嚇啲人名，改嚇啲數字，就已經可以當係今年嘅調整電費新聞，其穩定性相當於在每年大除夕，電視台派記者到街市訪問買餸主婦：「今年豬肉、蔬 菜有冇貴咗呀？」
今年電費新聞有乜新意呢？聽講係中電可能順應環保團體之倡議，採用累進制收費，用電量愈多，電費愈貴，呢樣左丁山舉腳贊成，自己 寫字樓每個月交冷氣費達到每平方呎兩個幾，另管理費約每平方呎三元，但係樓上係美容院，一定用電多過自己間細公司啦，有乜理由同樣向大業主繳交同樣呎價嘅 冷氣費吖，如果用累進電費制，每個寫字樓單位應另裝電錶，先至對中小企公道。如果全港推行累進電費制，粗疏啲講，照理可以將用戶分層，按每月用電量由低至 高分成十級，最低之兩級用戶減電費，中間三級之電費不變，最高之五級則增加電費百分之三到百分之十，如此一來，甚麼民生關注組就冇反對加電費之理由，環保 團體得其所哉，唔會反對。電力公司有冇收益減少？根據市場學之 80/20原則，即八成收益來自二成客戶（此道理看似粗疏簡單，但往往幾準繩），兩電唔見得會減少收益噃，當然兩電掌握詳盡數據，計數可以更準確。
反 對人士仍然會有嘅，就係大用戶，譬如港鐵、機管局、商場、酒店、大酒樓等等。但大用戶有能力、有技術裝置太陽能、 LED及種種慳電設計，電費加咗，佢地更有節省能源之推動力。又或者話，佢地將成本轉嫁俾客戶又如何？哦，呢個可能性難以排除，市民千祈唔好誤信人言，以 為減排與環保係免費午餐，淨係睇嚇美國咁多年來拒絕簽署京都議定書，已知道係乜嘢一回事！正正就因為經濟成本高，美國先至唔肯簽啫。