📖 ZKIZ Archives

中環我至靚 左丁山

2011-12-03  AD

蘋果日報 B叠有一個圖片專欄，「中環我至靚」，日日有一張中環 OL靚女相片，華洋不拘。左丁山問過張老總：「中環雖然有好多靚女出沒，但日日影到一張相，幾難為攝記大佬嘅噃？點樣做法？」張老總告知：攝記唔易做，日 日企在娛樂行外吼，舉起相機拍照，如果靚女願意合作，就會企定定任攝記影完又影，否則怒目而視，又不時有巡警出現，懷疑攝記會影女士裙底，趕佢走，於是攝 記唯有打游擊，去吓 IFC、中環中心呢啲有大群 OL嘅地方。讀者日日睇到一張靚相，其實張相得來不易。
上星期五朝早，睇「中環我至靚」，覺得 位靚女有啲面熟，但醒唔起係邊個，後來俾記者Ｇ睇，佢立即大叫：「哎吔哎吔，靚女咪係新城財經台嘅記者Ｃ囉！」咦，係噃，乜咁蹺呀，相片在中環中心外拍 攝，竟會影到一位朋友，自己識得嘅，機率應該好低啫；既然識得，記者Ｇ送張蘋果去俾記者Ｃ，記者Ｃ見到又係嗌咗一聲，不敢置信，佢話唔記得在甚麼時候俾人 影咗喎。記者Ｃ來自南京，在中大讀完新聞碩士後就到新城財經台互聯網電視以普通話報導財經新聞。
中環中心偏近上環，冇置地廣場或 IFC咁顯眼，大廈內有好多國際公司，譬如基金、律師行、金融等等，「金融時報」香港辦公室以及星展銀行總部就在此大廈，平時上午九點前上班繁忙時間，可 以見到唔少美女 OL，至於「蘋果」攝記若在此企定定，是否會有好收穫，咁就要講運氣撞手神咯。
賓架Ｐ係攝影高手，佢教訓過左丁山，影相不能靠手 神，要靠耐性與不斷嘗試，佢每年到外地拍攝大自然嘅相片，有時為咗要等角度、天色與陽光，往往用幾小時嚟拍一張照片。聽佢咁講，左丁山就想起在中文大學新 亞書院之「天人合一」水池拍照，自己從未影到靚相，次次都係背光，人在水中央，影到似一個黑影，非常之沒趣。「天人合一」風景絕佳，金公耀基稱之為香港第 二景，所有到中大參觀之友人幾乎都會到此一遊，但可惜呢，總係難以影到靚相，遺憾也。

PermaLink: https://articles.zkiz.com/?id=29830
Next Page
ZKIZ Archives @ 2019