|
||||||
|
前此，新地郭家大少炳湘幫鋪頭去成都覓地，想似得香港同上海咁，整番座成都IFC國際金融中心，作為新地插旗地標。家吓郭大少已變作郭前主席，成都IFC亦變為成都環球貿易廣場，但新地只得四成權益，唔似得上海之 IFC咁，新地百分百全資擁有。 反觀吳光正之九倉就積極得多啦。三年前佢哋揮低新地、太古、和黃等香港大孖沙，以人民幣七十二億元投得成都市中心地王，單位價格每畝地八千八百元，紀錄至今未破。 不過，以高價投到塊靚地唔等於工程就可以順利展開噃。開工挑地腳，即發覺地下原來係幾條唐、宋朝留落嘅大街。古蹟文物攸關，工程當然馬上被喝停，而一停就停咗兩年幾至復工。 今後投地，除咗要搵識得計數之精算師，睇嚟更加要諮詢考古學家至好落疊，否則一涉及古蹟，分分鐘工程一拖就十年八載，到其時條數就認真襟計矣。 吳光正之九倉高價投得成都地王，但忘記咗諮詢考古學家意見，以致工程一拖就兩年幾，條數襟計也。（于港民攝） 成都開闢「新界」 四川素有天府之國之稱，作為四川之古都，唔使講成都歷史悠久，好有文化。但今時今日嘅成都，放眼四望，一個唔覺意，閣下可能仲以為返咗香港。 何以見得？Well，現今成都既有「禮頓山一號」又有「領峰」；「淺水灣」之外，更有個「銀鑼灣」 —— 銀矜貴過銅，銅鑼灣改為銀鑼灣，冇研究之至，但點解唔去到盡，改為「金鑼灣」？唔使咁謙噃。 不過，最是頂癮者，睇怕都仲係「新界」矣。今日啲成都人知唔知新界係乜呢？佢哋又識唔識搵番紅毛嚟管呢？少咗英國人冇咁馨香o架噃。 白頭局長凡間財神 動畫版《清明上河圖》公開展出前一晚，煲呔遠赴赤鱲角主持揭幕式，及後會場開放俾馬會之賓客參觀。煲呔鬆人後兩三個鐘，金管局前白頭局長施施然攜眷而至。係避開煲呔抑或費事同人逼，則佢老哥至知啦。 唔好以為佢睇得輕鬆噃。白頭前局長形象突出，一踏足展館就俾唔少女粉絲認出，將佢團團圍住同佢影相。有啲仲直接開口問佢攞投資貼士，當正佢係凡間財神咁嘅款。如果佢肯出山，啲乜嘢二叔、三叔、四叔、五叔、六叔冚巴冷企埋一邊。 金牙大狀講嘢 陪審團想講乜呢? 旺角嘉禾大廈大火，兩名消防員犧牲。死因庭作出裁決，兩者死於意外，但陪審團同時建議處方要加強設備。裁決或建議，是但一個錯，兩者不能並存也。 若然兩名消防員果如裁決所言，係死於意外，則設備顯無加強之必要，而陪審團加強設備之建議則謬矣。反之，果如陪審團所指，處方有必要痛定思痛，加強設備，則完善恰當之設備當可以免兩名消防員於死矣。既然建議改善設備，兩名消防員又豈是死於意外哉？ 故此，一係兩名消防員意外犧牲，咁加強設備之議當然絕不成立。一係兩名消防員並非意外犧牲，乃由設備有欠完善所致，咁固然有必要依陪審團所言改善設備，更應有人要為兩名消防員之死負責也。 既有裁決復加建議，此又豈止畫蛇添足而已，更是矛盾犯駁，抑或陪審團另有所指？ 代郵：口痕友見上個禮拜金牙大狀撐大家樂，話佢哋絕非魔鬼，由是有所非難，甚至懷疑金牙係咪食咗某人之下午茶餐。口痕友冇聽過凜於正義、抱打不平，係有pro bono呢味嘢乎？正一狗眼看人低也。 上等人劉夢熊 大家唔好睇全國政協劉夢熊今日意氣風發，就以為佢從來都咁掂噃。查實佢好似唔少人一樣，都試過有落難嘅日子者。話說當日佢一時周轉唔嚟，要去台灣行開吓。但落難都好，佢極有交帶。臨行佢俾電話債主之一，曰：「要去一轉台灣，欠你嘅十五萬還唔到啦！」 事隔五年，忽然有人上債主間公司，交低封信就轉身而去。接待員交封信俾債主，佢一打開，赫然見到內裡有張二十萬嘅支票，此外別無片紙隻字。債主好生奇怪， 乜嘢人咁樣送錢上門呢？翻睇CCTV錄影帶，發覺送信上嚟者並非別人，正是劉全國政協也。當時佢已經由台灣回流，更加進入上升軌。 於此可見，劉全國政協非但為人有交帶，更加係有借有還之上等人。利息雖然奀啲，但有錢收，債主已經開心到暈，換轉係第二個，十五萬之數早已撇賬矣。 鬍鬚‧曾拋歪書包 鬍鬚‧曾俊華最新之網誌，以「冰與火：緊縮與寬鬆」為題，論花旗「量化寬鬆」對特區之影響。大題目也。 可能因為咁，鬍鬚‧曾由是覺得有需要拋拋書包，故此一落筆，佢就話「寬鬆與緊縮，孰優孰劣，則是人人言殊。」 呢個書包拋得正唔正呢？上網查查就知啦。似乎太史公嘅寫法係「言人人殊」而非「人人言殊」噃。兩者差之毫厘，謬之千里。鬍鬚‧曾話佢篇網誌係落飛機當日寫者，書包拋歪咗，會唔會係時差所致呢，又？ 本週圖片 不如拆紀念碑啦！ 古語有云，野火燒不盡，春風吹又生。香港嘅野草一如香港人，生命力特強，雖然係深秋時分，敝欄特派專員目測發現，中環立法會旁紀念碑頂上又再長出野草矣。 一如專員再三指出，紀念碑長出野草係對捍衞香港之英靈極大不敬。建築署年來除草無成，皆因佢哋除草不得其法，只識拔草而不曉封石罅，此又豈為根治野草之道？ 如斯求其是但，不如將紀念碑拆之哉，攞塊地出嚟拍賣呀，笨！ |
||||||