ZKIZ Archives


做迷雲黨成負累 失自信險抑鬱鄧健泓逃離TVB鬆口氣

1 : GS(14)@2016-03-15 15:09:52

■鄧健泓在無綫工作20年,終於都要離開勇闖新天地。攝影:陳俊強



鄧健泓2005年離開無綫,07年因經濟拮据,當時無綫總經理陳志雲向他招手,其後被指「空降」回巢,成為「迷雲黨」員,還以為他可以扶搖直上,怎料負評如潮,被網民鬧至體無完膚,當陳志雲失勢之時,周遭的人即一沉百踩,令他自信全失,更險些患上抑鬱症,幸好一次演出機會,令他重拾自信。上周四鄧健泓跟無綫結束20年賓主關係,一直被無綫視為棄將的他,最後未有選擇投靠恩師陳志雲加入商台,因他不想重蹈覆轍惹來閒言閒語,下定決心靠自己創出新天地。撰文:非非


鄧健泓離開無綫五日,感覺如釋重負,日前他在觀塘接受本報專訪時,第一時間開心分享離巢第一擊,就是大後日公演的舞台劇《走婚》,問他離開無綫的感覺,他淡淡然說:「每樣講緣份,我諗我同呢間公司緣份完咗,我應該話對呢間公司已經冇感覺,其實近呢兩年,我都係做自己嘢,搞自己製作公司,夾band,做舞台劇,三、四年不停自己搵工作,只係交代畀公司,所以我心理上已經好ready離開。」鄧健泓簽經理人合約,慘被投閒置散,他苦笑說:「如果TVB係有畀機會我嘅話,哪怕係一個好細嘅角色可以發揮,我都好心滿意足。」



■鄧健泓當年幫張敬軒(左)做演唱會嘉賓,讓他獲得重生的機會。資料圖片

■鄧健泓視陳志雲是親人、是哥哥,去年志雲判刑當日,他希望身體力行支持對方。資料圖片



被鬧樣衰感受傷

1996年加入無綫,2005年鄧健泓曾離巢外闖,2007重返無綫,被冠以「迷雲黨」,他說:「07前我拍一個內地劇收唔到錢,當時我真係好亂,因為我係家庭支柱,咁我冇晒錢,又喺北京拍緊嘢,佩華姐(無綫藝員科)打電話嚟,陳志雲又打嚟話『TVB會歡迎你返嚟㗎!』當年我返到去,所有人都覺得我係黃馬褂,所有人都唔記得我之前好努力咁做。只要陳志雲話幫我就戴咗好多有色眼鏡望我,大家唔記得我前嗰八、九年,我係用我嘅能力生存,當我冇咗啲機會,有個貴人喺我身邊出現,我梗係開心喇!但換來係好多指指點點、閒言閒語、是是非非,令到我好冇自信心,我記得我連最基本嘅自信心都冇,變到好似乜都唔識,個個都喺度話我,幾難聽嘅說話我都聽過,例如『你樣衰到咁你唔好做戲喇!』『嘩!你得唔得,你唔得你X啦!』好難聽嘅說話,我真係hurt到。」被視為迷雲黨的鄧健泓飽受壓力,工作量開始銳減,加上一直積壓的負面情緒,他開始出現抑鬱症狀,他說:「我又冇睇醫生,但我係會唔開心,有啲病徵係冇自信心,好似唔識做戲,覺得所有人唔鍾意我,唔敢出場,但我開始明白,我嘅工作都係為咗生活,由Day1開始我要support我屋企。」幸好鄧健泓在張敬軒演唱會出現了一次重生的機會,他擔任嘉賓,獲得全場掌聲,令他重新釋放自己。陳志雲對鄧健泓照顧有加,卻又令他陷入是非漩渦,鄧健泓有否後悔成為迷雲黨?他意志堅定說:「冇,我諗呢啲全部係緣份,全部都係機緣,如果我當時唔去把握,我屋企可能已經冧咗,我冇錢到連家用都畀唔到阿媽,出街都唔敢出,真係有得必有失,你話係咪介意,開頭我真係好介意,以前從來未試過咁多人唔鍾意我。」



■陳志雲(右)07年叫鄧健泓回巢,從此鄧就被視為迷雲黨。資料圖片

■離開無綫後,鄧健泓緊接演出舞台劇《走婚》,跟舞台劇演員劉至芝合作。



借Honey謝陳志雲

重提陳志雲是Honey一事,鄧健泓表示從此之後不敢講「honey」:「當年我去查小欣個訪問,佢畀咗好多食物列咗出來,揀到李詩韻我冇理由公開戀情話佢係蜜糖,所以我話佢係水,到最後得蜜糖同檸檬,陳志雲我就話佢喺蜜糖,因為蜜糖係有療傷嘅功能,我冇嘢做時佢拉我返來TVB,我生活可以返去正常嘅軌道上面,我可以療傷,佢就畀到個療傷作用我,完咗方力申打畀我,話我答得好好,之後有報道就話鄧健泓認叫陳志雲做honey,呢樣嘢就流芳百世。」攝影:陳俊強





來源: http://hk.apple.nextmedia.com/entertainment/art/20160315/19529217
PermaLink: https://articles.zkiz.com/?id=297940

Next Page

ZKIZ Archives @ 2019