ZKIZ Archives


妻代報平安:康復中羅浩楷椎間盤凸出歪頸

1 : GS(14)@2016-03-11 00:51:17

■羅浩楷去年初疑因脊椎問題致腰患纏身,幸得太太悉心照顧,楷嫂表示楷哥已康復九成。資料圖片


現年66歲的羅浩楷曾是《歡樂今宵》的扮嘢高手,又擅演奸角,但近年在螢光幕消失。昨日有周刊指楷哥去年突然患上怪病,一覺醒來已無法站直,出入需以輪椅代步,日常生活亦無法自理。經一年休養始漸見好轉,但仍需戴頸箍支撐,且行路易失平衡,健康情況令人擔心。



■羅浩楷扮嘢了得,反串唯肖唯妙。

■羅浩楷(左)曾是EYT的中流砥柱,歌舞皆掂。電視圖片

■羅浩楷自去年初拍罷無綫劇《東坡家事》後,已近一足消失於螢光幕上。



炒股維生

楷嫂昨日在電話中以爽朗笑聲代夫報平安:「啲報道誇張咗,康復中,佢好番九成幾喇,行得走得,揸得車,而家醫生都唔使睇。」問及是否如報道中所形容的「怪病」,楷嫂笑言:「怪乜鬼嘢病吖,椎間盤凸出之嘛,唔係中風,否則都唔行得啦!都係睇骨科,照到X光係椎間盤凸出,而家扭番正條腰,淨係爭條頸,戴住個頸箍係因為唔好睇,出街又驚人撞,佢喺屋企都唔使戴。」楷嫂表示楷哥最嚴重時腰骨向下彎曲90度,她指醫生稱此屬正常現象:「因為啲骨要搵位走,但而家都正晒㗎喇,係爭啲條頸啲肌肉需要做番啲運動,練番啲力,做吓按摩就得,就係咁簡單,多謝關心。佢唞多啲好啲,唔好坐咁多,等條頸休息多啲。」至於成因,楷嫂又笑言:「唔係乜嘢一覺瞓醒搞成咁,係累積番嚟嘅,見越來越冇力,就去睇醫生囉。」其實早於04年,楷哥亦因心痛要做手術,問今次幾時可以復工?楷嫂謂:「等佢再靚仔啲先啦,而家咁樣點復工箒?」她直言楷哥休養期間肥咗,待完全康復後要做多運動。問停工一年醫病,經濟可有問題?楷嫂劈頭便說:「冇問題!佢有玩開股票,全個TVB都知啦!」據悉楷哥向來有積蓄,曾擁兩個物業,2012年以$350萬放售牛頭角淘大花園物業套現傍身。採訪:嵐山





來源: http://hk.apple.nextmedia.com/entertainment/art/20160310/19522718
PermaLink: https://articles.zkiz.com/?id=297499

Next Page

ZKIZ Archives @ 2019