萬南 二五中環 陸羽夥計利是和味
1 :
GS(14)@2016-01-10 17:35:01http://www.metrohk.com.hk/index.php?cmd=detail&id=299738&search=1
唔少生客去陸羽飲茶，都有類似嘅經驗，地下夥計趕你上一樓，點知一樓叫你去二樓，二樓又推番你落地下。因為陸羽地方有限，飯枱梗係留畀貼士好疏爽嘅熟客啦。萬南有次農曆新年同大老闆去食飯，親眼見識到佢點派利是，除咗全部侍應永不落空，洗碗清潔工都輪流出嚟講恭喜發財，嗰刻先知道陸羽原來有咁多夥計。
萬南突然講陸羽，因為今個星期有單案完咗，所以先至放膽講，話說陸羽有位前會計，非法收供應商回佣兩年幾，金額多達一球以上，竟然無人察覺，後來良心發現自爆出嚟，最終判監兩年。件事喺陸羽茶客早已有傳，大家笑言原來陸羽回佣咁和味，更議論紛紛點解冇人發現，睇嚟第三代傳人Tony都要返多啲舖頭坐鎮咁話喎。