K11水晶聖誕樹聖誕打卡好去處
1 :
GS(14)@2015-11-13 08:26:44聖誕仲有個半月先到，各大商場經已爭住幫燈飾亮燈，前晚費清路過尖沙嘴，見到幾有趣嘅聖誕樹燈飾。呢個燈飾位於K11嘅露天廣場，由好多細細粒嘅LED燈泡組成，掛喺個兩層樓咁高嘅鋁架上面，隱約見到一棵圓錐形嘅聖誕樹慢慢咁轉動。驟眼睇好似冇乜特別，但當你登入指定嘅WiFi網絡，就可以連接去一個專用網頁，入面有禮物、紅心等唔同嘅圖案，揀啱之後向上一撥，即刻可以喺樹上面見到，夠晒互動。喺現場忙住測試嘅靚仔日本藝術家竹井卓哉同費清講，呢個《Crystal Tree》裝置係由佢哋團隊「teamLab」用半年時間整嘅，再由日本運到香港裝嵌，總共有1萬8千個燈泡，由程式即時運算，每秒鐘構成嘅聖誕樹形態都唔一樣。佢話年年一式一樣嘅聖誕樹睇到悶，希望可以整個裝飾畀欣賞嘅人一齊參與。除咗互動聖誕樹之外，K11仲有一個直徑3.5米嘅巨型《人造月》，以及多感官藝術體驗空間《Seven Keys》由節能LED燈泡組成，用燈光呈現光影藝術，全部展覽到出年1月3日。另外仲可以順便鳩嗚，由今個月27號起喺K11消費夠1500蚊就可以贏聖誕禮物，夠1000蚊可同時參加抽獎，有機會贏到雙人「Vivid Sydney」悉尼燈光音樂節6日4晚之旅。費清＃要生計，也要生活＃毋忘初衷
來源:
http://hk.apple.nextmedia.com/news/art/20151113/19371259