佘詩曼 時日如飛
1 :
GS(14)@2015-11-02 00:39:102015-10-21 EW
二○○○年的時候，你在做甚麼？那一年，佘詩曼接拍了劇集《十月初五的月光》，與張智霖為「君好」和「初哥哥」打造了一段細膩真摰又令人心痛的感情。
歲月如梭，從前那個眼大大、一張孩子臉的他，現在已經是紅遍東南亞、有型有款的「Cool魔」；而那個當時對演戲還沒有太多概念的她，亦當過了兩次雙料視后，被譽為「港劇女王」、「TVB一姐」。
一切恍如是彈指間的事，但原來就這樣相隔了十五年，今天《十月初五的月光》搬到大銀幕去，縱使他和她也有了不同的際遇，然而時間的洗禮下，「君好」和「初哥哥」當時的那份心動，卻仍然猶有餘韻。
「嗰陣我仲係白紙一張，乜都唔識，我好冇壓力同好冇負擔去拍呢套劇；但呢次再拍番，大家都想比以前做得更加好，最初有啲擔心，好彩第一日開工，導演：『三、二、一，roll機！』所有嗰陣啲感覺同感受都即刻返番晒嚟！好奇妙！好神奇！」阿佘說着說着，一雙眼閃着點點感動的淚光。
打從選港姐至今，她已入行十八年，下年約滿無綫後，無論去向如何，驀然回首，那些一直以來拍戲的點點滴滴，其實就如「君好」和「初哥哥」那段情懷，總會讓她難以忘記、感受至深。
千禧年接拍劇集《十月初五的月光》的時候，佘詩曼才廿五歲，雖然已經是十五年前的事，但有些事情，她還是歷歷在目，例如頭髮。
「我好記得第一次開呢套劇嘅會，寶華姐（編審陳寶華）話要我剪短頭髮，仲要係好extreme剷到男仔頭咁，我當堂想喊出嚟，我嗰陣啲頭髮留咗十幾年喎！我心諗：『吓？為咗一個角色、一套戲要剪頭髮？唔係啩？』勁唔捨得呀！」說時她皺晒眉頭。「後來寶華姐仲慢慢同我解釋：『信我啦！我覺得君好呢個角色咁活潑、咁跳脫，應該係短頭髮㗎！可能對你嚟講，會係一個好大嘅轉變，我唔會害你㗎！』我諗咗好耐好耐，去剪嗰陣好似去斬頭咁，個人好down，連個髮型師都知道我唔開心，一剪我就喊！哈哈哈！家諗番起，其實好好笑！」
又例如當時的她和Chilam張智霖，心口都掛了個「勇」字。「有場戲唔知邊個提出，叫『初哥哥』載住我揸電單車，由大三巴衝落樓梯嚇我，我哋一聽到：『好呀！』就去！嘩！『登』到我呢！由條腰一直chok到上頸呀！今次導演（葉念琛）問我哋有乜嘢嗰陣做過，家想做番，我哋大家都諗起呢件事，不過到最後大家都唔敢再試，家都冇咁嘅勇氣啦！咪搞咁多嘢啦！哈哈哈！」
阿佘九七年成為港姐季軍後入行，才履行港姐職務大半年，便被安排參演劇集《生命有take 2》。「啱啱選完港姐之後，一直都有好多人照顧自己，有保母take care我，乜都唔使驚，但一拍劇，一下子身邊冇晒人，我就得番自己一個，身邊冇人識，好似去咗個好陌生嘅地方咁，乜嘢都唔識，只係知道又要記對白，又要記走位，好多嘢記，一啲都唔享受！」
最要她命的，是那段日子幾乎每齣劇，她都要演慘情角色。「嗰陣成日要逼自己唔開心，但我唔係呢種人，拿捏得唔好，導演要我喊，我心諗：『點喊呢？我家唔想喊喎！』哈哈哈！真係唔識做㗎！跟住外界又不斷係咁打擊我嘅自信心喎，搞到我愈嚟愈唔鍾意呢件事，覺得自己唔適合拍嘢，唔係my cup of tea。
「不過命運就係會咁逼你，我每次一閃過呢啲念頭，好快又要拍第二樣嘢，又或者係『快啲瞓啦，得番三個鐘瞓又要開工啦！』咁囉，哈哈！咪惟有不斷咁行落去囉！
「我好記得，嗰陣拍《生命有take 2》時，都問過華哥黃日華點樣可以演好啲，佢話：『你做得多（戲）就得㗎啦！』我心諗：『咁咪即係冇講！』」說時她做了一個藐樣，忽然又睜大了雙眼。「但後來發現，原來華哥咁講係真㗎！演戲真係要靠經驗累積番嚟㗎！」
直至接拍了「君好」的角色後，她才終於脫離了演「慘角」的宿命。「終於都唔使喊，我真係好開心㗎！哈哈哈！好似做番自己咁，啲觀眾自然覺得我唔同咗，可能係咁，我喺演戲方面，個腦終於『bling bling』開咗竅，終於有番啲自信心。」亦因此，那年，她終於憑着這角色，第一次在《萬千星輝頒獎禮》獲「本年度我最喜愛的電視角色」，又跟Chilam一起成為該屆「本年度我最喜愛的拍檔（戲劇組）」得主。
那時獲獎後，可有壓力嗎？她即很肉緊地笑着說：「冇喎！邊有壓力㗎？淨係覺得好開心！冇諗過攞完個港姐季軍之後，竟然演戲都仲會有獎攞喎！之前啲人（外界）明明話我唔識演戲㗎嘛，變咗呢個獎成為咗我一個好大嘅推動力：『出年我都要攞獎呀！』因為努力演戲係有用㗎！」與此同時，她又努力改善自己的雞仔聲。「一有時間咪大聲朗讀報紙半個鐘囉，好有用㗎！」
結果，阿佘於○六年憑着在《鳳凰四重奏》中一人分飾四角，在當年的頒獎禮，同時獲取了「最佳女主角」及「我最喜愛的電視女角色」獎項，成為首位雙料視后。「《四重奏》拍時好辛苦，但又好好玩！因為拍嗰陣，啲劇情係跳嚟跳去咁拍，我都係靠啲衫嚟辨認自己係邊個角色，個人都演到有少少精神分裂！哈哈哈！」
十八年水銀燈下的日子，阿佘一直馬不停蹄地拍呀拍，至今她已參演逾五十齣電視和電影，拍過逾千集電視劇，少不免辛苦和捱更抵夜的體驗，最高紀錄是拍一齣內地劇，足足五日四夜沒有躺到牀上睡。「嘩！個半月要拍三十集，仲要頭五集我要做兩個角色！嗰五日四夜，我嘅肉體同靈魂都分開咗，個人係飄浮嘅，好彩仲讀到對白。嗰次之後，我嘅身體弱晒，食極都唔肥，係幾個月之後，我返夏威夷放咗幾個星期假先好番啲。 」
又試過拍《火舞黃沙》，拍到體力透支。「喺沙漠拍已經夠熱，體力透支得好犀利。阿戚（監製戚其義）為咗真實感，有場我同黎姿講嘢嘅戲，佢仲要用牛角扇係咁吹啲沙，我哋眼又擘唔開，又成口沙，根本演唔到戲！哈哈哈！就算係平時食飯，食一啖都要即刻閂埋個蓋，如果唔係啲沙就會吹晒入去，好似驚人會搶你咁，好好笑㗎！」
長期這樣捱法，累嗎？「有時我都會諗，我只係一個女人，點解要咁辛苦呀？」她的語氣忽然變得很沉重。「好記得拍《4 in Love》最後一日開工，開足三十個鐘，拍完廠景，仲要出去電視城個巴士站拍吊威吔，扮cat woman，我一上到去，已經全身冇力，全世界好靜，我淨係聽到啲威吔『嘰、嘰、嘰、嘰嘰嘰嘰嘰……』嘅聲，嗰吓我忽然好驚、好辛苦，喺度諗：『我家究竟為乜呢？點解我要咁辛苦呢？』我嗰吓真係好想放棄，無論係mentally同physically我都好攰！真係好攰！」猶幸這個想法，也是一閃即逝。「後來睇番playback，睇到場戲拍得咁靚，我又會同自己講：『算啦，都最後一日咯！』咁又冇事，唔記得晒㗎啦！」
說罷，她又再發出「哈哈哈」的響亮笑聲。
1.十五年前的「初哥哥」和「君好」，零負擔、零壓力的演出，令二人在劇中的那段感情也變得無添加，成為了經典。2.跟張智霖再演「君好」和「初哥哥」，默契依然。「呢張孭我嘅海報，一take就中咗。」3.相隔十五年再聚，一眾《十月初五的月光》台前幕後，再重拾那份「大家庭」的融洽感情。
再見君好
努力拍戲多年，阿佘早已獲獎無數，更是圈中出名的小富婆，直至近年，她終於減產，讓自己心境和生活取了個平衡。「我家嘅心境，係入行以嚟最舒服，以前唔諗咁多，係咁一味死衝，係咁拍。但家我會多咗時間去過正常生活同預備一個角色。」
所謂「正常生活」，包括她經常被傳媒拍到與不同的男士行街、食飯和睇戲。「唔通次次出街都call一大班人出嚟咩？哈哈！其實影咪影，寫咪寫囉，我冇乜所謂。」有報道說，她因為家中擺了催情桃花陣，才吸引了這麼多「桃花」啊。「吓？真係有啲咁嘅陣㗎？哈哈哈！我如果話家冇人追，你信唔信呀？哈哈！不過要遇到一個啱嘅，又唔係咁容易囉，都要觀察吓嘅。」
湯盈盈、蔡少芬等身邊一眾好姊妹這幾年也結了婚，有了孩子，其實間接也令她改變了生活習慣。「個個第二朝都要送小朋友返學，食完飯都要走啦，都唔好難為佢哋啦！「其實我都好鍾意小朋友，有段時間都好想生，但係家要養育一個小朋友壓力好似好大咁，太多嘢要諗，咁我就索性唔諗住，玩吓人哋嗰啲先囉！哈哈哈！」
接着，她隨即看着鏡子整理頭髮，但見攝影師忽然向她舉機，便笑個不停轉身撒嬌：「咦，做乜啫？」
那些笑聲、那副笑容，其實最似十五年前那個傻大姐「君好」。
1.去年《使徒行者》「丁姐」一角，令阿佘的演藝事業再上高峰，一次過橫掃「最佳女主角」、「最受歡迎電視女角色」及「中國內地最受歡迎TVB女藝人」三個獎項。2.○六年憑《鳳凰四重奏》成為「最佳女主角」和「我最喜愛的電視女角色」首位雙料視后。同屆則由鄭嘉穎當選視帝。
撰文☆周彩霞 攝影☆蔡豪 化妝☆Katherine Lo 髮型☆Lorraine Lam @ Hair Culture 設計☆美術組 服裝提供☆Ted Baker及McQ by Alexander McQueen（鞋履）Jimmy Choo、Rupert Sanderson及Giuseppe Zanotti Design 場地提供☆港島海逸君綽酒店