ZKIZ Archives


出土男神 54歲型爆復出 銀髮林俊賢:我啲經歷慘過《大時代》

1 : GS(14)@2015-06-11 12:47:38

2015-05-28 NM



消失娛圈近廿年的無綫小生林俊賢,去年低調復出拍電影《最佳嫌疑人》後,早前再為應采兒做監製的網劇《天才在左瘋子在右》埋位,五十四歲一頭銀髮的他,依然型英帥。離開娛圈後兩度炒股輸身家,身心受挫搞到身體出問題的林俊賢,經過痛苦掙扎成功翻身,變成證券行、廣告及製作公司老細;見重播《大時代》被熱捧,林俊賢說:我啲炒股經歷慘過《大時代》。

免疫系統失調

一頭銀髮,身形健碩的林俊賢,比起廿年前在成名作《男兒本色》飾演徐湘,更多添了一份成熟的型格,從商多年,經常要穿梭北京、深圳,戲癮發作,林俊賢重操故業,為處女監製應采兒埋位拍網劇。「我做個有精神病嘅智者,睇完劇本就好想做!我自己身體都有啲不好,四年前患上蕁麻疹,唔可以太操勞,太大壓力或唔開心,會好易復發。拍呢個劇講明只係要十幾日,又俾足時間休息,咁先接。(如果無綫搵你?)我都會考慮玩吓。」林俊賢說。

輸兩次身家

離開娛圈的日子,林俊賢經歷大起大跌,情緒受困,因而令免疫系統失調,賠上健康。據了解,離婚後,女兒跟前妻生活,之後的一個女友為林俊賢誕下一子,其時,他轉行做股票行,全職炒股,因為買賣神仙股,輸掉整副身家,女友亦因此帶同兒子離他而去,四十幾歲人,人又冇錢又冇,輸晒!林俊賢面對現實,咬緊牙關由零開始。邊度跌低,邊度起番身,到投資公司做策劃,又兼職做廣告,終於成功翻身。不過,歷史○七年再重演!林俊賢說因為miss咗個call,就錯失了一個大買賣的決定,股票投資,再次輸清光。林俊賢的股場經歷,拍得住《大時代》的劇情。「輸晒,全部輸晒!《大時代》只係做戲,我慘好多!做生意就好似賭博一樣,有起有落,有順有唔順;不過都過咗,經驗多咗,依家做生意學識穩陣,唔會俾自己再跌。諗番轉頭,我奉勸年輕人有乜大不了,瞓醒一覺,起身就冇事。」林俊賢說。

甲一球員變小生

入無綫讀第十一期藝訓班前,六呎高的林俊賢是籃球港隊甲一組球員。82年藝訓班畢業,同期有歐陽震華、吳鎮宇,87年在《男兒本色》擔正跑出;之後轉攻電影,又出過兩張唱片,95年轉行離開娛圈。

最想同萬子合作

屢敗屢戰,從失敗中吸取教訓的林俊賢索性開證券公司,教人投資。「做證券行咪唔使驚!投資其實冇問題,但如果抱住以小博大心態,咁風險就大好多,所以應該投資唔係投機。例如窩輪,你用對衡角度睇就好安全。」講起投資心得,林俊賢滔滔不絕。除了金融生意,林俊賢說他會投資電影,新片已開始籌備中,對於同期的戰友黎明,仍有保持聯絡,但林俊賢最想合作的藝人是萬梓良。當提到當年同劉嘉玲傳緋聞,林俊賢不忿說:「我都唔知點解當時會有呢啲新聞出現,我都要向劉嘉玲講聲唔好意思!趁呢個機會,鬧一鬧作呢單嘢條友XYZ……」當年憤青,今日五十四歲,一樣有火。

15年後父女重逢

錢銀,女人!同樣兩次打敗仗的林俊賢強調現階段是單身。對於再搵番個伴,他說:「成日都搵o架啦!(仲有冇同前妻或者以前啲女友聯絡?)之前嗰啲都唔理我喇!」當年前妻帶埋女兒離開,從此失去聯絡。林俊賢尋親抽絲剝繭,在fb尋遍跟女兒出生日期相同的女孩,再從其他蛛絲馬跡確定身份,之後搵朋友跟女兒在fb做friend,一步一步發展至約出來見面,至安排父女重逢。見面一刻,林俊賢哭了。女兒今年20歲,跟細仔一樣不時都有聯絡,彌補失去。
PermaLink: https://articles.zkiz.com/?id=290799

Next Page

ZKIZ Archives @ 2019