ZKIZ Archives


歸隊 寰亞派糖留人 側田嗒完閃投Paco

1 : GS(14)@2015-06-11 12:39:36

2015-06-11 NM


北上搵食無錢途,12年側田死死地氣回歸香港,簽約寰亞娛樂旗下。眨吓眼三年合約屆滿,公司歌手走吓一個又一個,為氹側田續約留低,公司開水喉,幫側田開了兩場《We Touch Live 2015世界巡迴演唱會》;臨尾派糖,但當事人已落實轉會,重投Paco(黃柏高)懷抱,加盟太陽娛樂,同近期大熱人劉浩龍做同事。拖字訣

轉投寰亞三年,只派過兩隻歌上台,連大碟都未出過的側田,上週五(六月五日)在紅館舉行一連兩場《We Touch Live 2015世界巡迴演唱會》。個唱開三面台,主力咬老本唱舊歌,但舞台設計絕不馬虎,樂隊同dancer的陣容更加可以同場數多的巨星有得揮。公司咁落本,全因滿約在即的側田,對續約一直表示有興趣但又未肯作實。「近一兩年公司啲歌手走得七七八八,側田雖然唔算一線,但起碼唱得又可以創作,公司都好想keep住佢。」一名寰亞唱片職員透露。早在今年初,寰亞方面已開始搵側田傾續約,起初雙方都有來有往,但到二月中,側田的態度開始轉淡,多次以忙於應付演唱會做藉口,一味拖!

回復狀態

續約拖住先,但為了今次個唱,側田多次向公司爭取製作費加碼,以為側田一心要做好演唱會,加上可以此作為續約籌碼,寰亞配合開水喉,豈料側田已暗中同舊老細黃柏高傾掂數。「阿田呢三年工作唔多,大碟又拖住唔出,佢對寰亞已經再冇信心,咁啱Paco搵到,個offer又唔錯,有機會走梗係搏吓啦!」側田身邊人透露。過去三年,側田人氣同十年前初入行差一大截,新歌又唔hit,但兩場演唱會入座率依然超過九成,一度肥腫難分的側田更積極修身,十足狀態。演唱會後,記者在慶功宴追問側田同寰亞續約一事,他眉頭一皺說:「我唔comment呀,sorry!做完騷我唔講呢啲!」在旁目及實的經理人林珊珊馬上將側田拉走!
PermaLink: https://articles.zkiz.com/?id=290789

Next Page

ZKIZ Archives @ 2019