【add】紅人主場：周汶錡 名模孕記
1 :
GS(14)@2015-05-14 08:35:44Escada桃紅色長裙Giuseppe Zanotti閃石高踭鞋金色黑石戒指
下周41歲的名模周汶錡（Kathy），2012年和靚仔法國男友Julien Lepeau結婚，甜蜜二人世界兩年，準時懷上第一胎，人生規劃美滿到不得了！已有八個月身孕的周汶錡，捧住巨肚拍照，眼神多了母性溫柔與幸福，七月開刀迎接新生命，中法混血BB已有「功夫熊貓」的乳名，專在半夜活動，「佢應該係派對型，生出嚟可能有黑眼圈，哈哈！」撰文：林妙萍攝影：郭賢興造型：趙潔恆髮型：Debby of Hair化妝：諺瞳.小白「仲有兩個月，心情好難形容，又想佢快啲出世，但又好享受佢而家喺肚入面呢個moment！」即將升格做媽媽的周汶錡，將於七月入院剖腹生第一胎，名模本事練成神奇遮肚法，長期不見巨肚。這天周汶錡依然着住模特兒標準尺碼的長裙、晚裝，貼身薄裙，巨肚才首次現形。
Ralph Lauren軍綠色閃石晚裝
Escada珠片花飾連身裙Giuseppe Zanotti金色高踭鞋
功夫熊貓ＢＢ
「ＢＢ而家兩磅幾，正常出世都係六、七磅，佢呢兩個月會快速增磅，可能遲啲都會開始辛苦，而家就ＯＫ。」名模媽媽好友琦琦、歐陽妙芝等，人人和她講述小生命如何神奇，如何奇妙，直到自己肚皮多動靜，才真正感受到，「你講畀我聽，我都冇嗰個感覺喺度，而家就開始慢慢感受到嗰樣係母愛。有時見到個肚凸起咗一個角，唔知係手定腳，定係籮柚仔pat pat，個角由一邊打橫掃去另一邊，好誇張！我又會諗，佢喺入面做緊乜呢？我會唔會壓實佢？會唔會夾親佢呢？」蝦餃（陳慧琳兒子）、小糯米（楊冪女兒）、小土豆（姚晨兒子）、小花（孫儷女兒）……圈中明星子女的乳名，全部都可愛又可口。周汶錡的中法混血兒子呢？相信應該會叫做Panda（小熊貓），「好好笑，因為老公妹妹有三個小朋友，兩個係五歲同七歲，佢哋問ＢＢ有名未，我話未，佢哋就話叫Kung Fu Panda（卡通片功夫熊貓），哈哈哈！因為覺得功夫就係中國人，啲朋友笑我，梗係啦，你成日唔瞓，等個仔出世，咪panda咁，一對黑眼圈囉！」不過，她表揚ＢＢ是乖寶寶，陀仔八個月，完全沒妊娠不適、嘔肚、賴床午睡等情況，「我真係覺得ＯＫ，冇乜唔慣，阿Ｂ都幾乖啦。不過，醫生都話我會早產，有四成孕婦都有呢個機會。」
■周汶錡與丈夫Julien於2012年結婚。
■Kathy上年40歲生日就大搞懷舊派對。
老公醫院陪瞓
周汶錡於2012年嫁給法國男友Julien Lepeau，兩人在法國南部、香水古城格拉斯的Chateau Diter古堡莊園舉行婚禮，翌年香港擺酒。不少準爸爸視為神聖大任務：剪臍帶，周汶錡公開拒絕老公操刀，令人失笑，「因為剪都要有技巧，剪得唔靚就無謂啦，都係畀專業人士做，何況佢都唔夠膽。」老公要入產房陪生，原來之後更會醫院陪瞓，皆因Kathy原來從未在醫院住過，「總之我好怕醫院，出世嗰日之後，未喺醫院留過院，所以都好緊張，可能一見到手術燈我已經震晒；喺醫院好寂寞，有佢陪住冇咁悶。」不過，初生嬰兒每隔兩小時要餵奶，相信將會忙個不停。
■Kathy與丈夫計劃生至少生兩個。
■今年2月Kathy透過傳媒發放比堅尼照報喜。
兩三歲才入學
梁詠琪被老公Sergio的西班牙傳統嚇親，法國傳統又如何？「冇乜特別，佢哋好casual，鍾意屋企多人，生細路就越多越好，我就最多生兩個，希望啦，太多我湊唔嚟。」Kathy和老公有共識，希望兒子有個開心、簡單的童年，「我哋諗法一致，兩、三歲先畀佢入學，唔會去playgroup，或者一歲就學外語嗰類。小朋友應該做番小朋友嘅事，讀乜學校、幾多歲做啲咩，冇乜壓力，唔會特別去安排。」子女人生成就、贏在起跑線之類？「冇乜期望，我覺得冇需要去控制太多，囝囝孝順、有禮貌呢類基本，最緊要過得開開心心。」
【靚孕婦潮着指引】
周汶錡陀住七、八個月身孕，依然輕鬆瀟灑，連身褲、高腰晚裝、高踭鞋，繼續有型有款嘅名模氣勢。「其實我都着番平時着開嘅款式，冇特別買太多衫。」她覺得孕婦腹大肚圓，一樣可以時尚示人，秘訣之一是服裝以簡單線條為主，「因為個肚已經有番咁上下，着得太累贅，反而會顯得臃腫。好多人諗住鬆身衫遮吓肚，但其實貼身啲，着出嚟嘅效果更好。」顏色也是關鍵，「唔好成日黑沉沉，最近興番pastel color，粉紅、粉紫、桃紅之類，都好精神又靚。」
■Kathy大住肚仍經常出席時尚活動，但身形仍舊瘦削，瀟灑有型。
Bottega Veneta牛仔珠片裙
1.簡約、貼身剪裁2.服裝細節及層次不宜過多3.避免黑沉色調，多穿粉紅、桃紅色4.活動應酬，宜化上淡妝更多精采時尚內容，盡在
http://add.appledaily.com。
來源:
http://hk.apple.nextmedia.com/entertainment/art/20150514/19146435