📖 ZKIZ Archives

私有產權不能強奪 左丁山

2011-10-30  AD

山頂何東花園有八十年歷史，夠晒古老，單睇建築物外型，已有古典美；再睇內裏歷史，既係何東家族興建及擁有， 歷年來應有不少名人要人到訪，自有歷史價值，何東自己，已經係一位香港政界商界嘅重要歷史人物啦。所以如果問：呢座建築物算唔算香港歷史古蹟，要保留，不 拆卸？相信絕大多數本港市民都會贊成；此建築物一旦成為可供公眾參觀嘅古蹟，必定吸引大量市民與遊客入內。
之不過，座建築物唔係我嘅，唔係你嘅， 將之「共產」咗，供公眾遊覽，舉手講句 yes，易過借火，唔駛甚麼公眾諮詢，都知道答案啦！但如果呢座物業係你嘅，或係我嘅？咁就梗係講 no啦！大型建築物位於山頂罕有地段，被綠色地帶包圍，拆建後可建築最少十幢 house獨立屋，每間點樣計都可以賣兩三億元，加埋嘅市場價值起碼值二三十億，業主點樣大方，都唔會雙手奉送俾政府做古蹟呀嗎？更何況業主何勉君希望在 十間屋之中，留番一間自住！
香港素來尊重私有產權，如張五常教授所講，私有產權係資本主義社會之重要基石，我地不能因為甚麼理由而摧毀，破壞之。 政府要保育古蹟，係迎合社會需求，但斷不能無償地強加於業主身上。應該以金錢買入，或以地換地（相同價值），先至公道。已有立法會議員聲稱立法會唔會通過 撥款買古蹟，林鄭月娥局長聲明唔會以「真金白銀」買入，又唔會以勾地表內之土地交換，立法行政機關都閂定後門，現任業主只能上法庭，申請司法覆核，討回公 道了。如果法庭判政府敗訴，政府又會點？
何東花園會係一單重要案例，特區政府以強硬姿態談判，業主係本港實力雄厚世家之後人（何東孫女），相信一 定有資深大狀做法律顧問，不甘投降，他日上法庭嘅機會頗高。其他世家有見及此，如果仍然擁有幾十年大宅嘅話，為防政府垂涎，必定急急求拆，提前改建，同政 府古蹟古物委員會鬥快！如果古蹟委員會真心為本港保留古蹟着想，與何東花園業主談判，要有多啲誠意，以免其他世家心寒。

PermaLink: https://articles.zkiz.com/?id=28836
Next Page
ZKIZ Archives @ 2019