樂香園：Catch me if you can 海迪
1 :
GS(14)@2013-08-06 23:35:50http://hk.apple.nextmedia.com/financeestate/art/20130806/18365580
證監會上周出咗張「溫馨提示」，令一眾投行人士牙痛咁聲。一般上市公司配售舊股，或者做俗稱「先舊後新」的top-up placement時，認購的投資者一直「自我感覺良好」地認為，只要獲確認分配通知，肯定自己有貨分，就算未到T+2股票正式交收日，配股後都可以即刻沽空去lock up利潤。只要趕及兩日後有貨到手，咁就無有怕啦！點知打虎越打越勇的證監，決心要掃清呢個「灰色地帶」，上周就警告大家要正式有貨到手先short得，講明會嚴打呢類偷步沽空活動。
有投行經紀就話，近月證監真係嚴到嚇親人，甚至派員入投行駐場check單。賓架慨嘆，市況差deal flow本來就少得可憐，而家生意亦只會越來越難做。事關咁event driven的市況，如果接貨後無得即沽，仲邊有客肯接？在證監緊盯之下，以後三、四線公司要批股會難上加難。又或者，要畀好大discount先做到。
至於buy side反應？坦白講，有芬佬仍抱住一種「Catch me if you can」的心態，事關芬佬們有多個投行account，在A行接貨在B行沽空，其實很難查，此外亦有很多「張良計」可技術性地避開呢個問題。如果證監真係要杜絕呢類活動，睇怕難免要來一招「殺一儆百」，方可收阻嚇之效了。
海迪