真假政經 - 王慧麟 懺悔 (2013年07月03日)
1 :
GS(14)@2013-07-09 09:10:49http://www.am730.com.hk/article.php?article=161578
【am730專欄】十六年了。我都係時候要盤點一下，過往半年的所作所為，向各位讀者既懺悔又交代一下。
懺悔一：過往半年寫錯咗嘅分析，應該就係叛諜事件。上個月寫之時，預計香港響美帝壓力之下，一旦進入司法程序，香港法院一定會將叛諜交出。
技術上，呢句話冇錯，因為叛諜既然冇去到法院呢個程序，自然唔會遣返美帝。當時嘅想法，係響最關鍵之時，香港一定會交人，以免影響港美關係。然後叛諜敗走蘇修，最後英雄被困莫斯科，估唔到也。
點解會分析錯晒呢？嗰日撞到外交界收風組猛人牛sir，真係要問個究竟。牛蛇話，叛諜有同蘇修接觸，蘇修睇完啲料之後，笑騎騎放毒蛇，話唔啱用兼多謝，好行夾唔送。
美帝呢？牛蛇話，一來發覺原來叛諜唔係偷咗最勁啲料，二來最好唔好返去美帝住，咁樣係對奧巴馬係最好的選擇，因為叛諜一返去美帝，單嘢真係會沒完沒了。北京又唔想收留叛諜，既然美俄中嘅最大公約數係叛諜唔好響自己國土出現，於是就變咗國際人球。
聽完牛蛇講完，成個人如夢初醒。國際政治呢家嘢，錯綜複雜，真係好難學習。香港人都係初哥。難怪政府律政高官講多咗些少嘢，話「冇乞意放生思樂冰」，立即畀美帝食住上猛咁鬧。係咁㗎啦，可能依家駐港總領事聽錯呢，因為我估美帝鬼佬唔識分懶音同正音，當正高官所講之「乞意」係「刻意」呢？幾十歲人，點樣改得到懶音呢？好在幾十年前冇DSE，如果唔係就真係頭痕了。
懺悔二，就係七一遊行。我一直認為，無論七一有幾多人走出來，北京同添馬都唔會有任何反應。表面上，呢句說話冇錯，因為你會睇到，早幾日高官個個走出來講嘢之時，個個面如死灰，同啲細路去教堂告解嘅樣差唔多。但係到咗政策真係要傾要講要做嗰陣，佢地嗰種大無畏、我永遠正確、睬你地都傻嘅態度又出番嚟。有時候你會問，點解一個正正常常、和平理性兼有紋有路嘅中環人，一走入政府就變咗城府極深、刻薄寡恩、偏聽小器嘅問責官員呢？唔係咩，你睇佳叔離開咗政府之後，依家講嘢，係咪好正常呢？
咁又係唔係冇任何改變呢？呢幾日開始吹緊一啲風，例如話換下一些不受歡迎嘅局長，又或者Hello Kitty領袖終於講，下半年最緊要係搞政改，就即係表示，上面終於立下決心，回應香港市民訴求，依家就觀察緊香港市民嘅反應，睇下可唔可以捱多幾個月咁樣。捱到下年至算啦。當然，表面上都仲係口硬手硬。
早前有基本法委員會委員話，只要確認到北京有否決權，一切有關困難都可以解決。又有親北京人士放風話，一有普選就預咗唔會百分百安全。上面又開始放風了，仲要係放暖風，唔係寒風。不過，冇人響七月艷陽之下開暖風機㗎嘛，唔通又係糖衣包裝……。(二之一)