真假政經 - 王慧麟 抵抗 (2013年07月04日)
1 :
GS(14)@2013-07-09 09:10:26http://www.am730.com.hk/article.php?article=161814
【am730專欄】點樣睇民情呢？一個比較客觀嘅做法，就係睇民調。建制中人，唔鍾意鍾Sir之民調，日日咁樣嘈。但自己搞咗嗰個研究協會，啲民調水平真係唔夠同國際標準接到軌，所以願意用嘅人唔多。坦白講，假如建制中人用國際兼科學標準來做民調，相信結果同鍾sir唔會差太遠。
我就反而鍾意睇下兩組人嘅反應嚟睇民意。第一組人，係娛樂界。依家娛樂界係同北方經濟最融合嘅產業。冇咗北方活水，娛樂界好多人好難存活。所以藝人要扮唔識政治，無論男女都好冷感(真係奇怪，明明血氣方剛，唔係個個響橫店就失晒控咩……)。但係，到咗連娛樂界都要拍電影嘲笑領袖，而且有藝人受訪時不避嫌嗰陣批評之時，嗰個政府都係咁先了。
第二組人係大學生。你會話，唔係嘛，大學生思想激進，佢地反政府，何奇之有？如果你相信呢個statement，I am sorry，一係你記憶錯咗，將自己幾十年前之大學生活浪漫化咗，當正自己生活響《挪威的森林》小說裡面。一係閣下冇讀過全日制之大學，或者無讀過大學，以為大學生個個都係咁樣。一係就中咗電視毒，睇得多學生抗爭嘅肢體衝突，以為大學生個個都正義上身。
香港大學生之特點係保守、練精同排外。有時佢地思想(指政治)之保守，真係不可思議。唔好以為響畢業禮上向領袖豎中指打交叉三鞠躬unlike(圖)係主流，如果問台下學生，好多都會係冇乜所謂。係呀，唔係發火喪鬧，又唔係起身拍爛手掌，而係I don’t care之表情。
0371之後，大學學生會及屬會，好多都慢慢畀建制學生把持掌權。其實，要操縱各大學學生會真係唔難，大部分大學生連自己身邊嘅事都I don’t care，更何況係學生會(所以建制派之頂層領導唔好誤信啲手下老吹，以為手下真係費咗九牛二虎之力，同泛民學生展開激烈嘅鬥爭，終於奪取咗學生會之領導權云云，實際上真係易過借火)？加埋只要有激進些少嘅學生蒲上來，就會有八卦雜誌跟蹤狗仔之，連響屋企穿丁字褲都上頭版。所以呢十幾年香港啲大學學生會就咁樣被鵪鶉咗。
依家就唔同。你會見到，有些明明係建制咗好耐，專講學生民生嘅學生會，突然又政治上激進咗，而且，連從來響民主事務上站在最後一線嘅母校學生會，都突然激進咗，成功擊退赤色學生。呢方面都幾重要，即係話，學生哥之激進方向，開始走上來。
原本呢，公共政策議題，響大學校園方面，唔會有太大反應。但係呢，有個Hello Kitty領袖，唔知點解委任自己友，特別係紅色分子做校長，咁就好唔同。原本啲學生，係遠距離感受紅色威脅，比較離身。但依家大學生忽然一朝醒來，紅色就在身旁，反應係點？你試下瞓瞓下覺，被樣嘢嘈醒，赫然發現有隻四腳蛇響你眼前伸長條脷郁郁下，你個反應會點樣？
香港唔同土耳其，大學生素來錫身怕事又怕死，唔會無端端反政府。但殺到埋身，唯有抵抗了。(二之二)