📖 ZKIZ Archives

基金專家之言 左丁山

http://hk.apple.nextmedia.com/template/apple_sub/art_main.php?&iss_id=20111003&sec_id=12187389&art_id=15667059&cat_id=255&coln_id=22

基金Ａ貴為跨國公司亞洲區（日本以外）總裁，久唔久就要返紐約一行，前星期佢就回去述職兼參加路演，應付華爾街分析師嘅「盤問」。返到嚟就係與左丁山約好 嘅午飯日子，大家坐在海灣道一號，望出玻璃窗外，陽光普照下維港景色冇得彈，真係心曠神怡，飯都可以食多一碗，不過近來啲老友唔興食飯，話怕會吸收太多碳 水化合物，增加血糖喎，如果食白粥，血糖更加多啲㖭。
樣樣都怕食，咪虐待自己？左丁山逢係美食當前，一於來者不拒，海灣道一號啲叉燒原來好好食，幾乎入口即融咁滯，真係有啲意想不到，但其他嗰啲餸，合格咁話啦。
基 金Ａ話在紐約一個星期，見到市面淡靜，行人面色比較沉重，欠缺勃勃生氣，以此觀之，紐約係美國經濟寒暑表，睇怕美國經濟唔好得去邊。佢有幸跟大隊入白宮參 加晚宴，在內裏感覺唔到興奮樂觀氣氛，奧巴馬之「就業演講」似競選辭令多過演講，人人聽完都冇厘興奮。總之明年係大選年，民主黨與共和黨均以贏得大選為最 大目標，國家經濟擺埋一邊先。
美國政治人物對選舉非常投入，基金Ａ有一次在酒店入，竟然見到共和黨熱門總統候選人羅姆尼在內，羅姆尼毫無架子， 亦無保鑣在旁，見到陌生人入就伸隻手出嚟與基金Ａ握手，加多一句： Thanks for your support（多謝支持），基金Ａ感覺愉快之餘，亦好老實咁講一句：「我來自香港！」羅姆尼嘅笑容即刻凍結咗。
基金Ａ話：「我在北京見過洪博 培，了解到此君對中國有深厚認識，可惜呀，佢現在大落後，怕冇乜機會咯！」洪博培外貌誠懇踏實，可惜缺乏明星魅力，在電視掛帥時代，於初選民望大落後，難 以反先是意料中事。離開君悅，又到文華東方，基金Ｌ要與左丁山見見面，唯有奉陪。講乜呢？原來係講吓「特首雙英會」嘅形勢，呢樣冇乜好講啫噃，問佢如何睇 一日上落七百點嘅股市，基金Ｌ竟然叫左丁山讀吓易經，可悟真道理！第十七至第二十餘卦更切合當前形勢喎！

PermaLink: https://articles.zkiz.com/?id=28235
Next Page
ZKIZ Archives @ 2019